11/27/2006

سكر وزبادي


محمد وأحمد ولاد هدى* أخت سماح صحبتى فيهم شقاوة ما تتوصفش
محمد عنده أربع سنين ونص
وأحمد عنده سنتين

هدى دلوقتى حامل فى الشهر التالت.. هى عايزة تجيب بنت المرة دى
نفسها أوى فى بنت

بس مصطفى جوز هدى مش عايز يجيب بنت.. هو عايز ولد تالت
مصطفى خايف انه يجيب بنت
هو حامل هم "البنت اتأخرت بره البيت".. "البنت بتلبس كده ليه؟".. " البنت ما تجوزتش لحد دلوقتى!". هو رافض جدا يجيب بنت
مصطفى بيتوعد لو جت بنت، هينتقم.. هينقبها وهى لسه فى اللفة

هدى زهقت من شقاوة ولادها.. مش مستعدة أبدا تجيب ولد تالت يطلع زى اخواته.. وكل الاولاد اشقياء طبعا
هى عايزة بنوتة.. وتكون حلوة.. عنيها ملونة وشعرها ناعم زي مامتها
هدى عايزة البنوتة عشان تلبسها لبس البنات.. لبس البنات احلى من لبس الاولاد
هدى عايزة تسرح شعرها الناعم وتحط لها توك من كل شكل وكل لون
وتعملها شعرها قصات.. مرة كيرلي ومرة الا جارسون
وهدى بتتوعد لو جابت ولد، هتنتقم ومش هتجيب له هدوم جديدة.. هتخليه يلبس هدوم اخواته القديمة

مصطفى مش عارف ان خلفة البنات نعمة من ربنا
مش فى باله لما الزمن يعدى والبنت تكبر وتبقى هى الايد الحنينه على كتف ابوها
وتبقى هى اللى تحت رجله وبتخدمه بعنيها
وتبقى هى اللى ممكن تقعد تسمعه وهى بيحكى حكايات قديمة، اخواتها مش مستعدين يضيعوا وقتهم فى سماعها
مصطفى مش عارف ان خلفة البنات بتدخل الجنة

هدى بأه.. مش عارفة ان البنت مش عروسة حلاوة
مش عارفة انها هتكبر فى يوم وتتصرف فى شعرها زى ماهى عايزة ـ تطوله تقصه.. شعرها وهى حرة فيه
هدى مش عارفة كمان ان لو عيون بنتها ما طلعتش ملونة وشعرها لو مطلعش ناعم بتفضل بردو بنت.. بكيانها وافكارها وعقلها

احمد ابن هدى ومصطفى لما يحب يعبر عن اعجابه بحاجة بيقول عليها: سكر ودادى.. يعنى سكر وزبادي
هدى ومصطفى مش عارفين ان خلفة البنات.. سكر وزبادي

هدى ومصطفى لما يجيبوا ان شاء الله المولود(ة) الجديد(ة) لازم حد يقولهم كل الكلام ده كله
انا عن نفسى هكلم هدى.. مين يكلم مصطفى ؟؟
---
الحدوتة حقيقية والاسامى مش حقيقية*

27 comments:

  1. akalimlik darsh walla te7tasy :) bas 3ala fikra mesh ma3aki fee al kilma dee (وكل الاولاد اشقياء طبعا) we fee 7agat keteera zayaha kida bas shaklik inty mesh mou7ayda :)

    ReplyDelete
  2. السؤال آلي طرحته عليا التدوينة هي الوسيلة آلي الواحد ممكن يقنع بيها شخص بأنه يكون مرحب ومبسوط بأن يكون عنده بنت هي أنه يقوله أنها هتخدمه لما يكبر. إلى هذا الحد صرنا أشخاص نفعيين حتى في نظرتنا إلى أولادنا...

    أنا حتى معنديش وسيلة أقناع أو مبرر غير أن البنت آلي هتيجي ده هتكون بنتك وهي أنسان مميز وفريد ومفيش حد في الدونية مثلها حتى لو كان فيها كل حاجة مش بنحبها، حتى لو كان ولد شقي ولا بنت عينيها مش ملونة.

    أنا دائماً بحس أن آي بيت بيكون دائماً محتاج على الأقل ولد وبنت، عشان ده بيعمل تكامل جميل ورائع، بيخلي البيت مليء بكل ألوان الطيف. أنا للأسف مكانش لي أخوات بنات عشان كده كنت كتير بحس أن نفسي يكون عندي أخت بنت.

    فين مصطفى ده؟ أديني مصطفى ده وأنا اكلمه.

    ReplyDelete
  3. جميلة النظرة ديه اوي
    قصة لذيذة اوي
    بسيطة و اصابت النقطة المرجوة بشكل كويس
    جدا

    البنت بنت
    و الولد ولد دي النتيجة النهائية
    يعني

    ReplyDelete
  4. انا بحاول افهم بجد مش فاهم حاجه قريت من فوق مره ومن تحت مره ومن النص مرتين وبحاول افهم لكن مفيييييش فايده
    عموما انا عارف ان العيب منى انا انا غبى او عبيط مش عارف
    >>>>>>>>>>>>>>>

    ReplyDelete
  5. بسم الله الرحمن الرحيم

    أخاطبكم بصفتكم أحد أنشط بؤر التفاعل فى هذا الوطن , وأعلم أنكم توقنون كما أوقن ويوقن كل شريف مخلص فى هذا البلد أننا نعيش لحظة فارقة بين تاريخ وتاريخ , وأن ما هو آت أيا ما كان إنما يمثل نتيجة تفاعلنا مع هذه اللحظة الفارقة فى تاريخ مصر , وفى كل الأحوال تنحصر تلك النتيجة فى احتمالين اثنين فإما النجاح وإما الفشل , فان كان النجاح فقد انتقلنا إلى زمن لم نكن نحلم ببلوغه وذلك لتواضع أحلامنا دائما إذا ما قورنت بما لهذا البلد من قوة , وان كان الفشل فقد انتقلنا إلى زمن سنتحسر فيه على أيامنا هذه وذلك لتواضع إدراكنا بأبعاد ومخاطر الكارثة التى يحياها هذا البلد .
    كذلك فلا يمكننا تجنب المخاطرة وتفويت هذه اللحظة الفارقة لأن عواقب استمرار الحال على ما هو عليه أخطر وأفدح من عواقب المحاولة والفشل .
    وكونى جزءا من هذا الجسد المواجه بحتمية التحرك والمحاصر بهذه المخاطر والتهديدات فقد استعنت بالله وقمت بعمل بحث بعنوان ( ثورة الإخلاص وطريق الخلاص ) وهو بحث عن طريق نهضة مصر والعرب وصيغة العقد الاجتماعي المرتقب , اعتمدت فيه على حسابات العقل والمنطق المجردة من الهوى والمصالح الشخصية لضمان الوصول إلى النتيجة الصحيحة التى لا يمكن لعاقل ردها .
    وعلى ذلك فهذا البحث وفى أفضل الأحوال قادر بفضل الله وحده على توحيد الصف المصري خلف فكرة قائدة واحدة تنجو به من هلاك محقق وتنهض به إلى ما يستحق , وفى أسوأ الأحوال فهو قادر على ترشيد التفاعل بين القوى الوطنية أفرادا وجماعات من خلال مناقشة بعض المواقف المشكوك فى إخلاصها أو ولائها أو إدراكها للواقع الذى نحياه .
    ولكونكم أحد أنشط بؤر التفاعل فى هذا الوطن فأنا أهتم كثيرا باطلاعكم على هذا البحث الذى نشر فى كتاب وتقوم بتوزيعه وكالة الأخبار ويمكنكم زيارة المدونة المسجل عليها البحث من خلال العنوان التالى :
    http://www.thawrtalekhlas.blogspot.com /
    وفقنا الله وإياكم لما فيه خير البلاد والعباد .
    والسلام عليكم ورحمة الله وبركاته .
    باسم محمد عبد الله

    ReplyDelete
  6. مفيش حاجه توصف معادله بنت و ولدى
    زى قصه سكر و زبادى
    حاجه من ارض الواقع
    معروضه بحياديه
    مع حقيقه ان البنت مش فستان و تسريحه
    ".
    زينب بجد بحب الحاجات اللى بنشوفها بعينيكى

    بالنسبه لمصطفى و هدى
    كفايه كلامك
    و ربنا يكرمهم
    ولد بنوته ده حاجه من عند ربنا

    المهم ياخدوا بالهم منوا او منها
    يحبوهم و يعلموهم
    و يخلوهم حاجه بجد

    ReplyDelete
  7. متفقة مع دنانير فى كلامها
    فعلا القصة واقعية بحياد تام
    بس سؤال eyewiness
    مهم جدا
    ومش معنى كده ان دى وجهة نظرك عن البنت بس هل ده هو الكلام اللى المفروض يقنه واحد بحتة منه

    يارب يجيلهم بنت علشان تنويع يعنى
    و البنت برضه يعنى حبة دلع كده
    ربنا يقوم هدى بالسلامة

    ReplyDelete
  8. مين يكلم مصطفي ؟
    اكلمه انا
    عرفيني عليه اما انزل واروح اكلمه بنفسي ان شاء الله

    انتي مش قلتي القصة حقيقية ؟

    اضافة الي موضوع الظلم الاجتماعي في مصر محتاج معالجة زيه زي التحرش الجنسي وضرب الزوجات وتاخر سن الزواج والمغالاة في المهور والتباهي بالافراح
    والتفرقة بين الناس علي اساس الوظيفة والعيلة
    الخ

    ReplyDelete
  9. بنت مصرية
    الحقيقة انا مدان لك بكيفية عمل مدونة
    اول مرة قرات مدونة كانت بنت مصريةوبعدها انشات مدونة عن طريق تتبع الخطوات المكتوبة ولكن لااعرف اعمل اى حاجة تانية ولذا اقترح عليك وعلى كل من يعرف اى مادة علمية ان يقوم بشرحها فى المدونة حتى يفيد الناس بدلا من الكتابة فى اى موضوعات واخير انا شاكر جدا لكى على تعلمى كيف انشا مدونة واريد ان تشرحى كيفية عمل
    اللينكات بالتفصيل اى خطوة بخطوة
    احمد
    www.ahmedsobhy.blogspot.com

    ReplyDelete
  10. المدونة رائعة ونفسي أسألك عملتيها إزاي، لغتك بسيطة ومباشرة، موضعاتك في الصميم
    لذا سمحت لنفسي أن أضع عنوان مدونك عندي، لو مش موافقة سأمسحها

    ReplyDelete
  11. أعتقد أن الله سبحانه و تعالى لما يرزق إنسان بولد أو بنت أو عندما يجعلى حتى لا ينجب فهو يعرف لماذا يرزقه بولد أو بنت أنا لا أرى أي فرق في أن تنجب ولد او بنت الفرق الأساسي بينهم هو الإنسان الذي نخرجه للمجتمع هل هو إنسان حقا بكل معاني الكلمة؟هذا هو السؤال.

    ReplyDelete
  12. هو أحيانا مصطفي ممكن يكون بيعمل كده مش لأنه فعلا من جواه عايز البنت تعيش بالشكل الفلاني بس يمكن لأنه مش قادر يتخلص من الأعباء الثقافية اللي خلقها المجتمع قبله وفي وجوده. المهم زي ما انتي قلتي كده ... الموضوع يتحل بالحوار والكلام مع هدي ومصطفي من غير نظرة استعلائية ليهم ولا بوصفهم مجانين واحنا اللي عاقلين وبس ... نتكلم ونسمع عشان نفهم وبعدين نحدد ايه اللي المفروض يتغير عند مصطفي وهدي. ومين عارف مش يمكن لما نكلمهم نقتنع بكلامهم؟؟ أو يقتنعوا همه برأي الريس وما يخلفوش تاني عشان السكان بيبتلعوا الحضارة والتنمية اللي هوه بيجبهالنا من بق الأسد. وربنا يتولانا بالرحمة. علي فكرة أنا نفسي في بنت بجد بسبب موضوع الحنية ده . ربنا يرزقني!! قولي أمين

    ReplyDelete
  13. قصة بتحصل كل يوم :(

    ReplyDelete
  14. اللى يجيبه ربنا كله خير
    لكن أنا متفهم جداً وجهة نظر الأب
    .....
    زمن كهذا الزمان ..غدا مهزلة ومحض جنون
    ما كان الذى كان ..ما كان الا الذى سيكون ...
    ...............
    وما أدراك ما سيكون؟

    ReplyDelete
  15. مصطفى شكلوا بيستهبل و بيدلع

    ايه يا عم الحاج ما تحمد ربنا و كل الى يجيبه يكون خير انشاءلله و يرفع راسك و اساسا لو مشيت ورا الحورات دي يبقى مش حتخلف اساسا الولاد بيشربوا مخدرات و بيشتروا كوتشيات كتير و هم صغيريين و لما بيكبروا لازم تجيبلوا شقه لما يجى يتجوز و حوراات منيله

    و اساسا هى هدى حتعملى فيها هدى شعراوى ماتستنى و تشوف ربنا حيرزقها ايه بدل ماهى عمللنا مشاكل و شويه نقعد نشوف حنسمى البنت ايه ليلى و لا لولا و الحورات دىو انشالله ربنا يرزقهم بالذريه الصالحه

    ReplyDelete
  16. خديني معاكي اكلم هدي
    :))))

    المشكلة ان فيه هدي كتير كدة فعلا
    زي ما فيه مصطفي كتير

    و ياخوفي لا البنت و لا الولد يطلعوا الضحية
    !!

    ReplyDelete
  17. والله انتى اللى سكر وزبادى يا مصريه
    ياه دى البنت دى نواره الدنيا

    والولد هو السند
    انا مش عارفه معقوله لسه فى ناس بتفكر كده؟؟

    ReplyDelete
  18. Nice story.
    I have two sons, no girls. To be honest when I was pregnant with my second child I really wanted another boy. My reasons were different. I felt that to raise a girl as I was raised ,in this day and age in the Arab world, would be hell for her and me.

    ReplyDelete
  19. بنت او ولد؟؟ مالفرق؟ اسنغرب ان يكون هذا التفكير مازال في بلادنا العربية

    ReplyDelete
  20. عرض جميل..لفكرة أحلى
    كل واحد بيفكر على هواه..وناسى هوى اللى مستنيه
    كل واحد بيبص من ناحية..وسايب باقى النواحى
    وعجبى

    ReplyDelete
  21. السلام عليكم
    أرحب بكم جميعا في مدونتي الجديدة
    http://abobaker.blogspot.com

    شكرا

    ReplyDelete
  22. عارفة ، كل اللي حواليا عارفين ان انا بحب البنات ، انا مقتنع ان الطفل يعني بنت ، دايما اقولهم ان انا لو جبت صبيان هوديهم الملجأ ، والله لسة لسة من شوية امي موصلالي دعاء من واحدة قريبتنا ، قالتلها ما دام بيحب البنات كده ربنا يرزقو بتوأم بنات ، ادعولي انتو كمان

    ReplyDelete
  23. انا من وقت للتانى باجى المدونه الروعه دى
    من علامات التدوين اساسا .. ماشاء الله بجد .. ربنا معاكى
    افكارك جميلة
    المشكله ان المولود لو بنت مصطفى هينتقم .. ولو ولد هدى هتنتقم .. لا اله الا الله .. الواد ( او البنت ) من قبل مييجى بيتحددله انتقام .. يا عينى عليك يابنى
    على فكره انا مع درش :)
    مش اوى بردو بس بحب الولاد .. وبردو البنات .. انا لسه متجوزتش انما بحب مريم جدا .. بنتى :)
    تحياتى

    ReplyDelete
  24. ما ابدع اطروحاتك الجميله

    ReplyDelete
  25. والله انت السكر و الزبادي
    تحياتي

    ReplyDelete
  26. اسلوب سرد ( سكر وزبادى ) رائع يعنى
    انتى بتحكى بتلقائية جميلة .. ولد او بنت اللى يجيبه ربنا كويس .. بس مش شايفه ان هدى هيطلع عينها سواء بنت او ولد ..

    تحياتى لكى
    وتحياتى لمصطفى وهدى .. او زى ميكون اسمهم
    وقبلاتى للمولود(ة) الجديد(ة) والسلام ختااام

    ReplyDelete
  27. ميرسى جدا على تفاعلكم الجميل مع الموضوع ده.. دا اللى كنت منتظرة فعلا الاقيه.. ناس لسه بتقدر البنت
    عجبتنى اوى ملاحظة "أي-ويتنس" فعلا مشكلة انى حاولت احبب فى البنات من خلال ذكر فوائدهم :) لكن للأسف لو اتكلمت عن البنت ككيان مميز وفريد مش هتكفى فى مجتمع بيحسب كل حاجة بالمصلحة وبالفايدة؟

    ReplyDelete