12/02/2006

يوم جميل جدا

يااااه.. أكتر حاجة بكرهها - اكيد مش اكتر حاجة اوى يعنى بس فعلا بكرهها جدا- انى اتأخر عن اى معاد.. وخصوصا معاد الشغل
المفروض ان معادى الساعة تسعة وعادة بوصل قبل كده بعشر دقايق او اكتر كمان، دا لأنى بعمل حسابى فى نص ساعة زيادة عن الوقت المقدر للمواصلات، يعنى شوية عطلة من هنا على وقوف وانتظار للعربيات من هنا وكده

بس من كام يوم بأه كانت مأساه فعلا.. خرجت فى معادى الساعة سبعة عادى جدا.. ورحت اركب والاقي عربية بسهولة جدا... وانا عارفة انى لو كنت اتأخرت ربع ساعة بس مكنتش هلاقى عربية الا بطلوع الروح. لما ركبنا السواق قال بعد شوية ان فى حادثة على الطريق.. انا بالمناسبة المفروض دلوقتى انى مسافرة على الطريق السريع بتاع مصر اسكندرية الزراعى، الحادثة عند منطقة اسمها ميت حلفا وموقفة الطريق.. فهو اقترح اننا ناخد طريق تانى كده، فى واحد اعترض لأن الطريق ده مش هيعدى على قليوب وهو عايز ينزل قليوب.. وقليوب قبل ميت حلفا، فهو والركاب اختلفوا، وفى الاخر السواق زرجن وقال مش هغير الطريق وخلينا زى ما احنا

المهم العربية ماشية ولمينا الاجرة واديناها للسواق والحمد لله على كده.. إلا وبعد تلاتاشر كيلو العربية وقفت.. والسواق نزل يشوفها وبعدين جاب شوية ادوات وفتح العربية وقعد يلعب فيها شوية، انا والناس زهقنا.. فاتت خمس دقايق.. طيب واخرتها؟ الناس سألوا.. قام هو جاب الاجرة من جيبه واداهلنا وقالنا اجرتكو اهيه، ادينى بحاول اصلح العربية، واللى مستعجل منكم يوقف عربية

يوقف عربية مين يا عم؟ الطريق دلوقتى كل العربيات عليه مليانة، لسه مافيش ولا محطة جت يكون فيها احتمال ان الناس تنزل ويبقى فى مكان.. ازمة

بعد حوالى عشر دقايق كده.. المشهد كان: اتنين فعلا نزلوا وقدروا يلاقوا عربيات وركبوا.. تمانية تانيين واقفين على الطريق بيشاوروا للعربيات.. واحد بس ما نزلش من العربية خالص.. بنت نزلت بس واقفة تتفرج على السواق وهو بيصلح العربية.. وانا بأه، واقفة مدية ضهرى للطريق السريع وبتفرج على المساحات الخضرا المزروعة وعلى العصفور اللى كل شوية ييجى جمبى ويبعد.. وعماله اتمرجح على حته طوبة كده وقفت عليها.. دى مش رومانسية، دا هبل بعيد عنك، او تقدر تقول كان عندى امل فى العربية تتصلح، او كمان انا عينى بتخطفها المساحات الخضرا جدا وبحس وانا ببصلها ان عنيا كانت جعانه جمال.. وافضل اتفرج كده على الاخضر الجميل اللى بيجلى العين ده.. هما بيقولوها كده

الجو كان ساقعة اوى، بارد جدا، وانا مش فارق معايا الوقت ولسه جوايا امل ان السواق يصلح العربية.. بس الوقت بقى يمر جامد ، فاتت تلت ساعة كده، ودا معناه انى بادوبك لو ركبت دلوقتى اوصل قبل معادى بكام دقيقة .. المسألة لا تحتمل تأخر تانى.. دا وترنى.. الناس ابتدت تلاقى عربيات وتركب.. طبعا اللى بيركبوا رجالة بس. لأنه كالعادة بيجروا هما على العربية ويزاحموا والبنات مش بيعرفوا يعلموا كده. مش بقى فاضل غير الراجل اللى مانزلش من العربية، وانا والبنت وواحد كمان اخد فى وشه ومشى عكس الاتجاه اللى كنا ماشيين فيه، وانا استغربت جدا.. رايح فين الراجل ده؟ كنت وقتها اتعرفت خلاص على البنت اللى كانت واقفة.. ماتعرفناش على اسامى بعضنا لكن ابتدينا نتكلم فى حكاية اننا اتأخرنا، فقالت لى ما تيجى نمشى زى الراجل دا ما مشى، فى محطة هنااااك عند الكوبرى اللى هناك ده... دا يا جماعة كان كوبرى مشاه على بعد 700 او الف كيلو كده. انا زمزأت.. هى قالت لى تعالى احنا مش خسرانين حاجة. ومشينا

بردو الجو ساقعة وانا وهى قررنا نوصل المحطة ده ونركب حاجة ترجعنا بلدنا ، اساسا انا اتأخرت على شغلى وهى اتأخرت على محاضراتها... كنت متضايقة انى لو روحت البيت هضطر اتصل بالمدير بتاعى واقوله انى اجازة.. وهو هيتضايق انى ماقلتلوش قبلها من بالليل.. وانا طبعا هعتذر عن كده.. وهسكت ومش هقول السبب يعنى مش هقوله انى اصلا خرجت واتأخرت ورجعت، لأن ببساطة دى حاجة مش فى صالحى ابدا وانا واحدة بتسافر من بلد لبلد عشان شغلها، اساسا القاهريين للأسف بيقلقوا من حكاية انهم يشغلوا معاهم ناس من محافظات تانية، عشان خايفين على المواعيد، مع ان الوضع بالنسبة لى انى انا غالبا باجى اول واحدة فى ايام كتير

اول ما وصلنا المحطة، لقينا اتوبيس.. ركبنا من غير ما نفكر. .او انا فى لحظة فكرت انى عندى شغل كتير وقلت لنفسى استحمل فكرة انى اتأخرت على الشغل وبلاش اعطل الشغل.. وخصوصا انى كده ممكن بالكتير اوصل بعد نص ساعة بس من المعاد.. مش ازمة ان شاء الله

قول ركبنا.. والاتوبيس اتحرك والشمس ابتدت تفرد لونها على الطريق.. والجو قرب يقلب رومانسية وخصوصا ان كان فى واحد من الركاب صوته جميل جدا جدا وهو بيقرا قرآن.. قعد يقرا، وخلانا كلنا فى حالة من الهدوء.. مش عارفة .. كنا مبسوطين .. بس الحياة مش بتديك كل حاجة.. اها... فعلا.. اديكو لسه فاكرين اهو.. الحادثة اللى عند ميت حلفا

فجأة بعد الجو ما كان ربيع، الطريق وقف والعربيات من كل حدب وصوب واقفة والحادثة فعلا شلت الطريق، واصلا الطريق دا مشلول لوحده كل يوم، كفاية كوبري قليوب معجزة هيئة الطرق والكباري المصرية، وايقونه الابهار فى فنون الزحاليق، كوبرى ازمة وكل اللى متعود يسافر كل يوم من عليه اسألوه هيقولكوا قصائد مؤلفة ومغناه فقط من اجل كوبرى قليوب.. باختصار الوقفة دى اخدت نص ساعة فى وشها

يعنى بعد الازمة ما اتحلت وعدينا من نقطة الحادثة كده اوصل بالظبط الساعة عشرة.. اعصابى خلاص انهارت.. وخصوصا لما ركبت المترو بعدين بأه اخدت تاكسى لحد الشغل ، بس انا كل يوم التاكسى بياخد دقيقتين بالظبط، انما المرة دى عشان اليوم جميل جدا كان المرور واقف فى الشارع واخدت حوالى عشر دقايق.. المهم وصلت عشرة وربع، فى خمس دقايق فرق عن الحساب، عادى بأه احتمالات الخطأ واردة

كان اول مرة اتأخر ساعة وربع بحالها.. وكنت متضايقة ومكتئبة، وفين بأه لما رقت شوية، بس عادى على اخر اليوم كنت فريش خالص واستعدت بهججتى وخصوصا لما عرفت من بنوتة زميلتنا انها مش هتسيبنا وتمشى من الشغل وانها هتقعد معانا، يومها فرحت جدا وقلت بجد الخبر دا يستاهل احداث يوم بالشكل ده

طيب المهم يعنى، انا اعرف ان فى شركات - وكتيرة - بتدى مساحة زمنية للناس اللى فى الشركة ييجوا فيها، يعنى مثلا قصادهم من تسعة لعشرة ييجوا.. وليهم تمن ساعات شغل، .. وخصوصا ان الشركات اغلبها بتكون مفتوحة طول اليوم.. طب دا انا اعرف شركة بتفتح اربعة وعشرين ساعة فى اليوم ومصرحة للموظفين فيها انهم ييجوا اى وقت من النهار او الليل، زى ما يعجبهم، وممكن يقسموا كمان التمن ساعات لأربعة واربعة.. المهم انهم يحضروا تمن ساعات وانهم ينجزوا فى شغلهم طبعا

هو طبعا الاحلى من دا ومن دا الشغل من البيت.. ما تيجوا نعمل حملة :))) ههههههههه
--
يييي التدوينة طولت منى بردو.. سورى يأه، الحبكة الدرامية تحكم .. بس انا حبيت احكيلكوا لأنى لما حكيت لماما هى اللى وصتنى احكيلكوا المرة دى.. تحيا ماما اللى بتشجعنى على التدوين

24 comments:

  1. alf 7amdella 3ala al sallama :) al wa7ed al mafroud ye2oulik kida kol youm ba2a :)

    we fakarteeny ana 3oumry ma eshta3'alt fee sherka -btw all those companies are 400+ employees- feeha formal business hours, ya3ni kolo kan flexiable zay ma bet2ouli arou7 ay wa2t we amshy ay wa2t we kaman tab3an momkin akamil from home bas da tab3an 3alshan the nature of work tesma7 be kida, ya rab tela2y 7aga kida :P

    bas just warnning:) after one or two years you will regret it because it will turn into over load and you will work more than normal business hours :)

    Cheers :)

    ReplyDelete
  2. نفسى الناس تقنتع بفكره التمن ساعات خصوصا ان الوصول من مكان لتانى فيكى يامصر من غير عربيه
    كارثه

    ReplyDelete
  3. :))

    باكون في أحلى حالاتي لما الناس كلها تكون في المكتب وأنا لوحدي اللي في البيت قدام أوبرا..

    اديتيني الشعور ده بتدوينتك الحقيقة مع إني في المكتب باشتغل :(

    --
    سلميلي على دعاء والنبي ..

    --
    إنتِ ما بتجيش ليه صحيح.. مش تبقي تيجي؟

    ReplyDelete
  4. زيزى

    حمد لله ع السلامة
    و شوفتى ازاى يوم بدايته سوداء ممكنينتهى بحاجة بسيطة بس ليها قيمة عندك ؟ أو العكس

    عجبنى اوى موقفك لما كنتى واقفة بتتمرجحى ع الحجر ده مش هبل انتى بتخرجى طاقتك السلبية بس بشكل طفولى
    :)

    و بخصوص المواعيد
    يا بنتى انا بينىو بين كليتى نص ساعه
    كنت بنزل قبلها بساعه و نص و كنت ساعات بوصل متأخر
    لعلمك احساس المرارة بيكون اكبر لما تكونى فى القاهرة و مش عارفة توصلى لحته تانيه فى اخر الشارع

    سلميلى على مامتك الجميلة

    ReplyDelete
  5. الشغل من البيت ألذ و أحلى فعلا و مفشهوش وجع دماغ بس معظم أن لم يكن كل الناس مش بيفضلوه
    يا ريت تكتبى مره تدوينه عن مزايا الشغل من البيت ... و عيوبه برضوه

    ReplyDelete
  6. انا ايضا احب المناظر الريفيه خصوصا اني في طريقي للمدرسه بامشي حوالي 3كم كله طريق زراعي يوميا

    ReplyDelete
  7. علي فكره الحكاية دي حصلت معي يوم الثلاثاء الماضي اثناء توجهي الي القاهره و الكل ركب عربيات علي الطريق لان فيه ركاب من معتادي السفر انذروا الجميع بضرورة الركوب و عدم الانتظار لحين اصلاح الاوتوبيس
    لانه بمثابة انتظار حتي اشعار اخر

    ReplyDelete
  8. طيب انتى احسن مننا يا بنت مصرية دا احنا فى الصعيد علشان نركب مواصلات لازم نكون جاهزين من الفجر علشان نركب مع صلاة الظهر

    العالم يتعامل بالثانية و نحن مازلنا نتعامل بالساعة الرملية

    ReplyDelete
  9. الحمد الله على السلامه والوصول المتأخر احسن من عدمه الله يخلي والدتك وديري بالك على شغلك

    ReplyDelete
  10. حمدالله على سلامتك أولا
    كده بجد انتى بنت .. مصرية .. فعلاً .. انا كنت ببقى فى التوتر ده كل يوم أيام شغلى القديم و مصيبتى كانت ان اتوبيس الشغل يفوتنى وده معناه انى مش هعرفاروح الشغل باى طريقة كانت .. ده غير مغبات انى اخد اليوم "عارضة" اى كانت اسبابى .. معلش ربنا يرزقنا بشوارع تانية نمشى فيها .. أصل العربيات برضه مش حل
    :)
    حمدالله على سلامتك

    ReplyDelete
  11. ايه النحس ده
    ده حتي البوست نحس
    صفحة التعليقات ماكنتش عاوزة تحمل
    وكتبت كومنت وبعدين عملت ريفرش(بعد ماعملت كوبي)وبعدين نسيت وعملت كوبي لحاجة تانية

    غريبة اوي انك بتيجي كل يوم علي نفس الطريق وبعدين تبصي للخضرة فاتعجبك
    اول مره رحت اسماعيلية شكل الارض بتاعتنا كان عاجبني اوي وبعدين حسيت انه عادي

    لما بيحصلي يوم نحس كده باحس اني عامل زي جيم كاري(مش فاكر اسم الفيلم)وان فيه كاميرا بتصور حياتي وبتتعرض وكل العالم بيتفرج ويضحك عليا وكل اللي حوليا ممثلين الا انا مش عارف ان اللي بيحصلي للتسلية
    عبيط مش كده؟
    :)

    ReplyDelete
  12. 3rby
    لا يا سيدى مش عبيط ,
    و الفيلم اسمه "Truman Show",
    انا كتير باحس الاحساس اللى انت وصفته ده بس ما ربطتش بينه و بين الفيلم قبل كده...
    Good Work يا معلم

    ReplyDelete
  13. ايوه
    "Truman Show"
    الله ينور عليك
    تعرف لما بيحصلي كده باقعد ابص حوليا
    وفي البيت بابص للسقف واشتم
    كده بقه مش عبيط
    كده دماغي لسعت
    ههه

    ReplyDelete
  14. انا بقى اجمل يوم عندى اليوم اللى بكون سهران شايل سلاحى على كتفى
    وبحرس دشمة طيارة افضل رايح جاى متحفذ لاى عدو منتظر الشهادة يارب اجعلنى وتقبلنى من الشهداء

    ReplyDelete
  15. مش لو كنتي عارفه من اول اليوم ان ده هيحصل
    كنتي خدتي معاكي كرة ولعبتي في الجناين


    وكنتي تضيعي وقت لغاية ما السواق يصلح العربية
    :)
    اقلك علي حل ما تقليش لعدوينك عليه

    جيبي اسكوتر
    ولا الحوجه
    وتروحي وتيجي زي ما انتي عايزة
    :)

    ReplyDelete
  16. زيزي
    ازيك اولا سلام جامد اوي لملم ربنا يخليهالك
    ثانيا حلو التفائل جميل جدا انا بحبه ايوه كده دايما خدي الامور ببساطه هي مش ناقصه حرقه دم
    انا بقى لما بتأخر عندنا نظام عقاب حضرتك يعني تقعدي بعد ما تخلصي قد ما اتأخرتي ده مش مهم بس نظرات الي حواليكي
    هه انتي ما روحتيش ليه ؟؟؟
    هههههههه
    وكده يعني
    باختصار فضيحه و جرس
    فكره الواحد يتجي زي ما هو عايز بتتطبق بره ياريت تتطبق هنا

    سلام بقه

    ReplyDelete
  17. على فكرة ممكن تعرضى على المدير عندك فكرة الشغل من البيت وللعلم فى شركة امريكية عملتها ان مفيش اى شروط للحضور تيجى متجيش تخلص شغلك فى البيت ,على النت لمهم الشغل يخلص وفعلاً الشركة كانت ساعات بتبقى فاضية خالص من كل الموظفين بس عادى طالما كل واحد بينجز شغلة ورئيس الشركة قال من يوم ما عملوا النظام ده وكل واحد من العاملين شغله بقى احسن وبضمير اكتر عشان نفسيته بقت مرتاحة ..وبجد فكرة عبقرية متيجو نعمل كدة.....اسف للاطالة

    ReplyDelete
  18. It's amazing how the beauty surrounding us can make us forget the ugliness of our real world.

    ReplyDelete
  19. فكرة الشغل من البيت فكرة تحفه طبعا
    وبعدين انتي بتغيبي كده ليه
    متبقيش تغيبي لو سمحتي
    بتوحشينا

    ReplyDelete
  20. انا بقالى يومين كل ما اجى ارد على التعليقات اتلخم
    و
    لوقتى عملت تعلؤيق ارد فيه على كل الناس بس ضغطت ريفرفش من غير ما اخد بالى وطار التعليق
    عااااا ;(
    بس خلاص بأه اكيد اللى فى قلبى هيوصلكو من غير ما اقعد اكتب

    شكرا اوى والله يسلمكوا يا رب من كل شر

    ReplyDelete
  21. Dear Bint Masriyah:
    I thought about you when i read this article:
    Smashing the Clock: No schedules. No mandatory meetings. Inside Best Buy's radical reshaping of the workplace

    http://biz.yahoo.com/special/allbiz120606_article1.html

    They call this "results-only work environment," (ROWE). Some 20 years ago, I applied this same principle in a rural hospital I was in charge of in Egypt and everyone was happy. The workers who go home after they finish their work early, those who do not have to come to work long before patients start arriving, and patients who can see that their hospital is very clean and served by smiling staff who love their work. Needless to say that I was punished by my superiors because I allowe dmy staff to do that. No big deal, I told my staff that I will pay whatever fine they are going to suffer so long as we keep doing our work right and we did.
    Dr. Ibrahim, USA

    ReplyDelete
  22. بنت مصرية
    7amdallah 3ala salamtk awlan ..da ahm mn kol 7aga..ana bgad 3agbny esloobk f el ta3beer...concerning working hours, most of the private sector companies believe in slavery which means : we give u a salary so u must work as much hours as possible so they dont abid with 8 hours and sometimes ..they force employees 2 work on saturdays and even fridays( wallahy tht happened in reality)..other companies which r the minority believe in human rights and tht 8 hours r enough 4 any person 2 filfil his work and tht employee must have 2 days off..I knew a comapnty tht permit its employeees 2 have 1 hour late during the whole month..tht means they start officialy at 8 but if u came 10 or 15 minutes late tht day and the day after, no problem el mohem el total of the month dont exceed 1 hour late

    ReplyDelete
  23. hi i am hussein my blog address is
    www.shahenda2006.blogspot.com
    it is concerned with english language teaching

    ReplyDelete
  24. قصة حلوة يا بنت يا مصرية

    أسلوبك جميل وتداعي الأحداث مش ممل

    بالرغم من إن القصة عادية

    بالتوفيق يا رب

    ReplyDelete