12/31/2006

... صدّام ...

قبل اى كلام.. كل سنة وانتو طيبين بمناسبة عيد الاضحى.. وسنة جديدة حلوة.. وعيد الميلاد المجيد.. ويارب ايامنا كلها تبقى اعياد
------------------------


أخر خبر فى الفضائيات.. الكلب مات
"اذكروا محاسن موتاكم"
طيب... يعنى اقصد.. صدام مات، بس بإيد الكلاب
اذكروا محاسن احيائكم
لا لا لا.. مين قالها دى بأه.. هما الكلاب، قتلوا صدام.. فى ليلة جابوه.. حاكموه.. عدموه.. السح الدح امبو.. ادى الواد لابوه.. ماقلنا الواد عدموه

يعنى كده.. واذ فجأة، بوش -وبوش يا عزيزى فى معجم "عبد المجيد" الصحاح هو رمز للعالم الأول وعصر المعلومات والويندوز- عايز يدخل 2007 على نضيف.. فقرر يعدم صدام.. صدام الطاغية.. اللى قتلـ وعذب وخرب بيوت وفسد وافسد واللى يستاهل ضرب الجزم.. بس انهو جزم؟؟
الجزم الامريكانى اللى برباط وبتلمع وكعبها ينزل ع النافوخ ما يخليهوش يحط منطق؟؟ اهو هو دا المنطق يا واد يا مرسي... يعدموا الطاغية بإيد الطغاه

شوف حكمة ربنا يا مؤمن
متأكد ان دى حكمة ربنا المرة دى؟؟

وفى عيد الاضحى كمان.. نصحى الصبح كده نلاقى الخبر.. اضحية السنة دى كانت صدام.. لحمة معفنه فى الاصل.. لا يتشفع لها عيد ولا عبد
عيب بلاش غيبة.. "ايحب احدكم أن يأكل لحم أخيه ميتا فكرهتموه"
ما هو عادى بأه... ايضير الشاه سلخها بعد ذبحها يا مرسى؟
ولا حتى قبل ذبحها الصراحة.. ما هم بيسلخونا وساكتين.. بيدبحوا بالنيابة عن اللى خلفونا وماقلناش حاجة

تلقى السيد الرئيس محمد حسنى مبارك التهانى من فخامة وسمو ملوك وأمراء ورؤساء البلاد العربية بمناسبة حلول عيد الاضحى أعاده الله عليكم بالخير واليمن والبركات

يعنى لو قعدت لوحدك تفكر.. صدام طاغية وظالم والحكايات عنه تشيب الولدان وتجفف الضروع.. قووم ايه.. ييجي الامريكانى يدخل العراق.. وكما تعلمنا فى كتاب التاريخ بتاع تالته اعدادى ان المحتل دايما بيستخدم نظرية حلوة خالص اسمها "فرق تسد".. اه وبصراحة ماشية لسه زى السكينة فى الحلاوه لحد دلوقتى.. بلس نظرية مهمة جدا "اضرب المربوط يخاف السايب" و "اللى يتلسع م الشربة ينفخ فى ايه؟؟ فى الزبادى يا محترم".. قال الامريكانى فليكن..

واحنا قلنا ايه؟
احنا -يامحترم بردو- لسه بندعي ع الغرب الفاسد اللى مطير النوم والارزاق من عين المسلمين الغلابة.. اه دا كان موضوع خطبة عرفه.. من جملة الموضوعات الكتيرة اللى فتح فيها الخطيب، والشهادة لله ما قفلش منها ولا حاجة

احنا لسه بندعي على الغرب

واحنا لسه بنبوس الجزم

بس الصراحة.. هو انا مش فاهمة.. بوش قتل صدام النهاردة ليه بالذات؟؟ ايه حكمته يعنى؟
هو متصور انه كده يتقرب زلفى للشعوب العربية اعاده الله عليكم بالخير واليمن والبركات؟
وللا هو عايز ينكد علينا فى العيد ويفكرنا اننا..لامؤاخذة.. شعوب عربية اعاده الله عليكم بالخير واليمن والبركات

انا: احمد.. عدموا صدام
احمد اخويا: عدموه خلاص؟
ضميت صوابع كف اديا اليمين وعملتهم ميكرفون وقربته من احمد
انا: ايه احساسك دلوقتى؟
احمد عدل لياقة التريننج واستقام فى جلسته وفكر برهة
احمد: ممم.. حاسس انى متأذي

اها، يعني جت عليه بأذيه... زيي تمام، سبحان الله

انا: شيماء.. تعالى اقرى التدوينة اللى كتبتها عن صدام.. بس لسه مخلصتهاش
شيماء اختى: صدام؟ ليه هو ماله؟
احمد: عدموا صدام
شيماء انصدمت الصراحة.. سكتت شوية قبل ما تنطق تقول اى حاجة.. ووشها باين عليه الخنقة
فين لما اتكلمت.. : فى العيد! باديهم! ربنا يغفر له - معرفش ازاى- بس ربنا يغفر له

- ترررن ترررن.. تررررن تررررررن
- الو.. ازيك يا حبيبتى.. كل سنة وانتى طيبة.. وبعودة الأيام

- ماما يا ماما.. اصب الشوربة ع الفتة يا ماما؟
- لا استنى شوية..

- ترررررن ترررررن
- ازيك يا حبيبى.. كل سنة وانت طيب.. وبعودة الأيام

- بابا يا بابا.. مين قال اننا هننزل البلد السنة دى بعد الضهر.. احنا طول عمرنا بننزل بعد العصر
- السنة دى بس.. عشان نخلص زيارات ونرجع قبل الماتش.. النهاردة الزمالك مع الاهلى
- يجد! يارب.. يارب الزمالك يكسب وما ينكدش علينا فى العيد

قال هى ايه الاذية؟؟ ان صدام يقتلوه (بعد محكمة صورية، وعلى ايد المحتل، وفى يوم العيد) وللا الزمالك يتغلب ( على ارض الزمالك وبين جمهوره وفى العيد بردو)؟

--------------------------
(وبما انى من هواة سيناريوهات ما وراء الشاشة.. برجع بذاكرتي للفكرة القديمة عن اشباه صدام.. مين قال ان دا صدام اللى لاقوه وحاكموه وحطوا الحبل حوالين رقبته.. وورونا جثمانه ملفوف فى ابيض؟.. مش يمكن "زاى واجد ذا دوج"* كالعادة؟

*they wagged the dog

27 comments:

  1. عظيم جدا للمره الثانيه علي التوالي اكون اول المعلقين علي الموضوع
    اولا كل سنه و انتي بخير و كل اسرة التدوين بخير
    ................................
    اثناء تحضيرنا لملا بسنا ليلا سمعنا هذا الخبر فاصابنا النكد قبل حلول العيد بساعات لكن كان فيه شك ان الاعدام قد يتاجل لسبب او اخر لكن بعد العوده من صلاة العيد و علي باب المسجد سمعنا الخبر
    كلمت امام المسجد و هو صاحبي و اكدت له الخبر فقالها علي الفور يعني قبل ما نذبح احنا الخروف يذبحوا لنا هم رئيس دوله!!!!!!!!!!!!!!!!!!؟
    كان الخبر حديث الجميع هنا في القريه
    اي زائر لبيتنا اول ما يدخل يقول قبل حتي ما يجلس صدام عدموه
    كنا دائما بنفتح التليفزيون علي قنواتنا المصريه في يوم العيد نشوف المحافظات بتعمل ايه في العيد
    لكن هذا العام كان استثنائي كانت الجزيره بخبرها النكدي هي القناه الوحيده المفتوحه و كان خبرها الوحيد هو اعدام صدام
    .........................
    باختصار العيد كنا كل سنه بنحاول نفرح فيه لكنه هذا العام كان غايه في النكد واللي زاذ و غطي ان حكامنا تبادلوا التهاني بالعيد و لم يذكره احد كانه فعلا خروف عيد اندبح و خلاص
    ..................................
    ----------------------------------

    ReplyDelete
  2. باختصار انا في غاية الحزن و للاسف العرب ايضا كلهم في غاية الاسف و الحزن حتي الزعماء قالوا كده لكن هل صحيح انهم حزنوا ان زميل لهم مات فعلا !!!!!!!!!!!!!؟لا ادري صراحه اكيد خافوا علي نفسهم
    اذا كان هذا هو رد فعلنا الوحيد اذن فنحن مجرد مجموعه من الشعوب العاجزه
    للاسف هذا هو الواقع الذي يثبت و يرسخ كل يوم

    ReplyDelete
  3. كل سنة و انت طيبة يا زينب :)

    ReplyDelete
  4. لما صدام كان بيقتل الاف الابرياء كان كل شئ عادي

    لما صدام قتله اي حد سواء عراقي او امريكاني او ابصر مين بقت مشكلة

    مش فاهم حاجة
    مش فاهم حاجة بجد

    ليه روح انسان واحد مجرم اصلا مهمة قوي كدة
    وليه ارواح الاف الابرياء مكنشي ليه قيمة وحتي الان ليس لها قيمة؟

    ReplyDelete
  5. ذو النون المصري
    مش هقدر اقولك غير ان دا كان رد الفعل التلقائى اللى رصدته فى اهلى وكل حد قابلته وكلمته عن الموضوع ده
    ---

    بلو روز
    وانتى طيبة يا جميلة :) تعود عليكى الايام بخير يا رب
    ---

    بن عبد العزيز

    بص يا شريف
    مفيش اتنين هيختلفوا على ارواح الابرياء اللى لابد ان يقتص لهم

    بس حكاية اعدام/قتل صدام دى بالظبط زى كلمة الحق التى يراد بها باطل

    الحق اللى كلنا عارفينه ان صدام قتل وعذب وبهدل الناس.. سواء اكراد او شيعه او سنة حتى.. سواء شعبه او جيرانه واقرب اهله كمان

    بس لما امريكا تعمل فيها ميزان عدل.. تبقى نكتة ، وبايخة كمان

    يعنى يا بن عبدالعزيز.. العدل اللى انت بتدور عليه المفروض يكون عدل نضيف.. نضافة وسيلة وغاية

    وقتل صدام لا كان وسيلة نضيفة ولا له غاية نضيفة يبقى مش عدل طالما بإديهم

    وبعدين لما امريكا تقتل صدام عن جرايمه ضد الشيعة وماستنتش لما يحاكم عن جرايمه ضد الاكراد وضد شعبه.. يبقى اسمه ايه ده؟؟ غير سياسة قذرة هدفها تزيد النار اللى بين الشيعة والسنة هناك؟؟

    قتل صدام حطبه جديدة بيزودوا بيها النار.. يبقى فين العدل والقصاص؟؟؟؟

    ولما يقتلوه فى العيد الاضحى.. وبالذات بالليل قبل صلاة العيد.... والنبى تفهمنى معناه ايه
    انا مش هقولك ان دى اهانة للمسلمين فى عيدهم وللا اذلال للعرب.. انما هقولك ان امريكا عارفة كويس اوى ان دا هيكون ظن العرب والمسلمين.. ان القاعدة العريضة منهم هتعتبر دا اهانة واذلال.. يبقى تنفيذ القتل تأكيد على الكلام ده.. وللا ليها تفسير تانى؟؟

    واخيرا على رأى الحج مرسى الزناتى: ليس كل ما يلمع ذهبا.. وليس كل اعدام لمجرم قصاص منه

    ReplyDelete
  6. في شىء فاتك
    صدام كان ديمقراطي بس في غلاف ديكتاتوري لان :
    1- معظم وزرائه كانوا من الشيعه
    2- ديكتاتور لانه بيبني وطنه شوفي الصين وفنزويلا ولو خاين وعميل زي صاحبنا مكانش اتقال عليه ديكتاتور
    3- هو مقتلش الشيعه هو نقل الناس المفسدين منهم وحطهم في مدينة الصد قرب بغداد - لاحظي الشريط الذي عرض في الجزيره لاعدام صدام وكان المنفذين يهتفون "عاش مقتضى الصدر"

    3- اثناء عهده محى امية الشعب واخد جائزة اليونسكو لاحسن نظام تعليمي في الشرق الاوسط

    5- بعث البعثات التعليميه الى الغرب حتى كان نسبة حملة المؤهلات العليا في العراق اعلى من مثلها في بريطانيا

    6- انشاء اسطول مصانع

    7- اعلى ناتج قومي للفرد في الشرقالاوسط

    8 - احسن نظام صحي في الشرق الاوسط



    ظبعا لازم يتخاف منه وامريكا تأمره باحتلال الكويت علشان يعرفه يحاصروه

    ReplyDelete
  7. كل سنة وانتى طيبة يابنت مصرية
    واتمنا ماحدش يترحم على الراجل لأنو مامات ولن يمت إن كنتم احرار !!

    واقول كمان يابنت مصرية
    انوا اليوم صارت ملعونة ارض العراق

    ! ملعون من فيها
    بكل شيوخها وساداتها وكهنتها وصعاليكها

    ! ملعونة


    ملعونة ارض العراق ملعون من فيها

    ! بكل عتباتها المقدسة وحسيناتها الرذيلة وكنائسها المجيدة

    ..ملعونة ارض العراق ملعون من فيها ولافيها سوى حثاله الأرض

    ! وزلة سقطت سهوا من السماء



    أعياد مباركة سيدتي

    .العَبدِالرَحَمن

    ReplyDelete
  8. انا اتحدث في مقتل صدام
    وليس عدالة الحكومة الامريكية
    فامريكا في سياساتها الخارجية ليست عادلة بشكل عام يكفي انها تمول طاغية مصر كل عام
    ومتواطئة مع اكثر طغاة العالم من اجل مصالح صرفة

    مقتل صدام او اعدامه علي يد عفريت لا يعني شئ
    وان كان ظالم قتل ظالم فهذا لا يعني ان الظالم القاتل اقل جرما من الظالم المقتول
    انا لم اقل هذا
    انا اري اعدام صدام هو العدالة بعينها لجرائم لا حصر لها
    اعدامه من اول يوم قتل فيه بريئا كان عدالة وقصاص يرضي الله

    صدام حسين جزء من المشكلة بل هو سببها الرئيسي
    هو الذي اخذ اموال ومساعدة الحكومات الامريكية المتعاقبة لحرب ايران
    وهو الذي خاض حربا مجنونة في الكويت
    وهو الذي جعل من نفسه الها يعبد من دون الله
    وهو الذي سحق الشعب العراقي حتي كره الشعب نفسه وحوله هو بنفسه الي مجموعات مليئة بالكراهية
    لا ادري لماذا ننسي ان صدام شخصيا هو المسؤول الاول عن تدمير العراق ؟
    ولماذا ننسي انه لولا عمالته ايام ايران للنظام الامريكي
    ثم جعله من نفسه الها لا يناقشه احد
    لما كان ما كان ولم يكن هناك مشاكل مترتبة عليه

    موضوع عيد الاضحي نفسه لا يهمني في شئ ولا اري فيه لا اشارة ولا علامة وكل التفسيرات اللي سمعتها هي مجرد استنتاجات

    ثم ليه الزعل ان امريكا في شبهة اهانة للاسلام وكان صدام يهين الاسلام كل يوم؟
    مش فاهم هو اهانة الاسلام حلال علي يد الطاغي العربي
    وحرام علي ايد غيره؟

    بالتاكيد فيه ناس شمتانة في صدام وخاصة الشيعة لانهم ضحاياه الاوائل
    مش عارف كان يبقي راي الناس ايه لو كان ليه ابن او اخ اختفي في السجون من عشرين سنة ولم يعد ؟

    انا حاسس ان الكلام ببلاش قوي
    وان المشاعر بقت فوضوية والعواطف بقت احاسيس تنفيس وفقط
    وفي النهاية لا انا ولا اي شخص يقدر يغير الواقع الان

    ولولا سكوت الشعب العراقي عن طاغية كهذا لما بلغ صدام هذا المبلغ من الطغيان

    نتعلم الدرس احسن
    والدرس بيقول

    الديكتاتورية رئة الاستعمار
    ولولاها لما كان هناك استعمار

    ووقود الديكتاتورية
    سكوت الناس

    ReplyDelete
  9. الله يرحمه

    سواء كان ديكتاتور أو ديمقراطى
    هايفضل قتله صدمه لما يكون أول خبر تقع عليه عنيا وأنا بفتحها فى أول أيام العيد

    وكل سنه وانتى طيبه يا بنت مصريه
    البلوج بتاعك من احلى البلوجات اللى قريتها
    روحك فيه فى كل ماكان

    ReplyDelete
  10. محمود
    فعلا صدق اللى قال .. صدام رجل مثير للجدل :D
    --

    العبد الرحمن
    صدام مثير للجدل "جدا" ههههه

    كل سنة وانت طيب
    ---

    بن عبد العزيز

    تعرف
    انت ما قلتش حاجة جديدة
    ما ردتش على اى جملة فى تعلقى ولا على اى تساؤل..
    كل اللى انا شايفاه انك صغت تعليقك الاولانى فى الفاظ وعبارات وجمل اطول

    انا مش مختلفة ولا هختلف ابدا على ظلم وطغيان صدام

    بس مش مستعدة ادخل فى جدال لفظى .. مش لعبتى بصراحة.. اللى عندى قلته فى التدوينة والتعليق الاولانى

    وسنة جديدة حلوة عليك يا عم.. يمكن يكون وشها حلو عليك وتقدر ترفع ظلم او تشيل ديكتاتور
    :)

    ReplyDelete
  11. شوق الياسمين

    كل سنة وانتى طيبة يا جميلة.. انا على فكرة بحب الياسمين اوى.. اوى.. اوى
    اكيد هنبقى اصحاب كده
    :)

    ReplyDelete
  12. بصي مش هاتكلم في حوار صدام
    هارد عندي
    المهم انتي زملكاوية
    كده هارجع اقولك زينب تاني
    اديكوا اتغلبتوا باعلان البوية اللي علي التيشرتات
    انا اصلا مابحبش الكورة ودخلت نمت في اخر ربع ساعة في الشوط الاول بس باحب ارخم
    كل سنة وانتي طيبة

    ReplyDelete
  13. احمد
    ايوه يا ابنى
    انا زمالكاوية ابا عن اخ عن اعمام

    كل سنة وانت طيبة
    سنة جديدة حلوة عليك يا رب.. وخصوصا فى مايو ويونيو ويوليو.. استر ياللى بتستر

    ReplyDelete
  14. خبر أعدامه كان رساله موجهه للمسلمين فى عيدهم فقد قرروا فجأه نحره كالشاه
    ثم دفنوه فجرآ كما حلا لهم
    الأمريكان يتلاعبون بمشاعر المسلمين
    وأن كان صدام قتل فكل الحكام العرب
    دمائهم ملطخه بدماء شعوبهم
    لكن لن نقبل أن يحاكمهم الأعداء
    بل يحاكموا فى بلادهم محاكمه عادله
    الخبر كان حزين جدآ على الأجيال اللى عاصرت صدام أثناء حربه مع أيران
    أو قبل هذا التاريخ أعتقد أنهم عرفوه بشكل مختلف
    فى النهايه هو لم يبكى ولم يسترحمهم
    بل مات كما يكون الرجال
    نتمنى عام أفضل للجميع
    بنت مصريه فين العديه
    أو حتى نص كيلو للحمه
    كل عيد وأنت مصريه الجميله

    ReplyDelete
  15. من يأخذ بالسيف
    بالسيف يؤخذ
    طاغيه وديكتاتور و دموي
    هذا ما سيذكره التاريخ بالأضافه الي أنه وضع يده في يد من أعدموه من قبل و ساعدهم و ساعدوه و لكن أخر خدمه الغز شنقه
    للمره التانيه أحط خلفيه منير الموسيقيه فالموضوع ده

    يا معلقين عالمراجيح
    و الحبل مستورد فاخر
    ليلتنا فاتت زي الريح
    ما هو كل حاجه و ليها أخر
    بس الحقيقه المذهله
    أنه الجميع فالسلسله
    فوق الرقاب يا معلمين أحبال قطيفه مدلدله ...
    أصل الخواجه أبن ماريكا لما بيدخل حواريكا
    يا أما ياخدك في بطاته لا أما يا بني هيئزيكا
    حاكم الخواجه أبن ماريكا هو اللي بدع الشيكا بيكا
    تدخل قفاه عايز تلعب
    هيرقصك سامبا و سيكا
    فتح عيونك فنجل جل جل جل جل
    لكل من جه يتحنجل .. جل جل جل
    أصل الجراد أشكال الوان
    حاطط علي الاخضر بيحش
    له ألف ماركه و الف دراع
    و كل يوم بيبدل وش
    ------------------------
    نظريه فرق تسد شغاله لحد دلوقتي و كل النظريات شغاله علشان داء العبط و الهبل و الهطل لم يشف منه هذه الشعوب من بعد ... صدام أصبح بطل عند بعض الناس لمجرد أنه أعدم .. أمال كانوا يطلعوه تاني يعني يضرب الأكراد و يعدم الأطفال و يملا الأرض ظلم و فساد .. شيء غريب مش مفهوم ... فعلا العصافير اللي متربيه في قفص بتحب القفص و لو الباب أتفتح مش هاتطلع ده حقيقي رغم أنه مخالف لكل القواعد الطبيعيه
    --------------
    كل سنه و أنت طيبه

    ReplyDelete
  16. بسم الله الرحمن الرحيم
    {أَنزَلَ مِنَ السَّمَاء مَاء فَسَالَتْ أَوْدِيَةٌ بِقَدَرِهَا فَاحْتَمَلَ السَّيْلُ زَبَداً رَّابِياً وَمِمَّا يُوقِدُونَ عَلَيْهِ فِي النَّارِ ابْتِغَاء حِلْيَةٍ أَوْ مَتَاعٍ زَبَدٌ مِّثْلُهُ كَذَلِكَ يَضْرِبُ اللّهُ الْحَقَّ وَالْبَاطِلَ فَأَمَّا الزَّبَدُ فَيَذْهَبُ جُفَاء وَأَمَّا مَا يَنفَعُ النَّاسَ فَيَمْكُثُ فِي
    الأَرْضِ كَذَلِكَ يَضْرِبُ اللّهُ الأَمْثَالَ }الرعد17
    {وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ }إبراهيم42
    {أَسْمِعْ بِهِمْ وَأَبْصِرْ يَوْمَ يَأْتُونَنَا لَكِنِ الظَّالِمُونَ الْيَوْمَ فِي ضَلَالٍ مُّبِينٍ }مريم38
    {الَّذِينَ أُخْرِجُوا مِن دِيَارِهِمْ بِغَيْرِ حَقٍّ إِلَّا أَن يَقُولُوا رَبُّنَا اللَّهُ وَلَوْلَا دَفْعُ اللَّهِ النَّاسَ بَعْضَهُم بِبَعْضٍ لَّهُدِّمَتْ صَوَامِعُ وَبِيَعٌ وَصَلَوَاتٌ وَمَسَاجِدُ يُذْكَرُ فِيهَا اسْمُ اللَّهِ كَثِيراً وَلَيَنصُرَنَّ اللَّهُ مَن يَنصُرُهُ إِنَّ اللَّهَ لَقَوِيٌّ عَزِيزٌ }الحج40
    صدق الله العظيم
    اظن واضح من الايات انه حمة ربنا فى اللى حصل لصدام تكون نهاية ظالم على ايد ظالم زيه
    وكل سنه وانتم طيبين
    السلام عليكم

    ReplyDelete
  17. مفيش كلام كتير يتقال
    بس اللى حاساه محشور فى زورى
    كلمة

    ولسه

    ___________

    كل سنه وانتى أحلى يا زيزى

    ReplyDelete
  18. اعجبنى كثيرا اسلوبك وفخرت ان هناك مصريات يكتبن بتلك الطريقة الساخرة التى افتقدناها كما افتقدنا الاسلوب الحر الذى تكتبين به ايتها الفتاة المصريه الان استطيع ان اخلع قبعتى وانحنى احتراما لك

    ReplyDelete
  19. This comment has been removed by a blog administrator.

    ReplyDelete
  20. This comment has been removed by a blog administrator.

    ReplyDelete
  21. مافيش شك اننا كلنا محروق دمنا من ان صدام يعدم على ايد الامريكان و اعوانهم من الروافض ذيول ايران و حكام العراق الفارسى الجديد

    لكن ده مش معناه قلب الحقائق و جعل المجرم مجنى عليه

    وللاسف اننا نلاقى ناس زى صحفيوا الاسبوع يعمل سرادق عزاء و يترحموا على روح شهيد العروبه صدام حسين !!
    هى الناس دى نست الفظائع اللى عملها فى شعب العراق و الكويت
    ولا هو الجثث اللى مكومه فى المقابر الجماعيه دى بتاعت ناس ماتوا بالبلهارسيا
    ثم ايه اللى قدمه صدام حسين للعروبه ؟

    ولا عشانوا ضرقعلوا صاروخين فشنك على اسرائيل بقى خلاص الناصر صلاح الدين

    لو حد يعرف يارييت يقولى لو سمحتوا

    ReplyDelete
  22. بما اني جيت بقي .. فهعلق علي كل التدوينات .. و دي بصراحة تدوينة جامدة من تدويناتك يا زيزي .. ف الجون علي حق ..

    انا اتصدمت جدا جدا .. كنت قريت بليل ف اخبار الجزيرة ان المحكمه رفضت النقض .. فقلت خلاص هيستنوا علي الاقل اسبوعين كده ولا حاجه .. رجعت من صلاة العيد و العريس أول مره يعيد معايا بقي و خارجة من أوضدتي الاقيه هو و بابا بينادوا عليا الحقي اعدموا صدام .. افتكرتهم بيشتغلوني .. طنشتهم .. وقفت مع ماما شوية ف المطبخ سامعه لغط منهم و من التليفزيون و طراطيش كلام .. ده باين الكلام صُدق يا جدعان .. جريت علي التليفزيون .. و يالهول الصاااااااااااعقة .. بيعدموه .. و هو بيشتمهم .. و بيصوروره .. و بيشتمهم .. بيتشاهد .. راحوا قاطعين الصوره .. يا نهاااااااااار ..

    علي فكره يا زيزي .. سراج من هواة نظرية المؤامرة و ما وراء الطبيعة زي حالاتك كده و مش مصدق انهم موتوه .. و اللي اتفرج علي فيلم الرهينة و شاف الجزء اللي ظهر فيه الجماعات الاسلامية بتطلق النار علي الدكتور كمال سحاب هيقول ف عقل باله ليه ما يكونش ده اللي حصل مع صدام و هو خلع علي اي بلد تانيه ؟؟ اللـــــــه أعلم !!

    علي كل حال .. لو كان مات .. فربنا يرحمه و يغفرله و يسامحه .. سواء كان محسن او مسئ فده شأنه مع ربه .. و لو كان خلع .. فبرضه ليه يوم .. و كلنا هنموت ..

    و الله وحشتوني :))

    ReplyDelete
  23. ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

    ReplyDelete
  24. ممكم لو سمحتي تقوليلي ازاي اشتغل علي الاكواد
    ميرسي
    عارف هتعبك بس انا عارف انك ماشاء الله
    وياريت تعملي ايميل تتسقبلي عليه الطلبات

    ReplyDelete
  25. الله يرحم صدام
    الراجل مات يا جدعان
    والأمريكان في العراق
    ومهربش ولا ولاده هربوا
    كان عنده 100 فرصه للهرب
    واجه الموت بشجاعه اسطوربه
    أنا مش عارف لو أي شخص في العالم مكانه كان هيعمل ايه؟
    وربنا علي الظالم

    ReplyDelete
  26. دة ايميلى ارجو المساعدة من صاحبه مدونه بنت مصريه

    K_adel_2004@hotmail.com

    ReplyDelete
  27. حسبنا الله

    عاش بطلا ومات شهيدا

    ReplyDelete