2/10/2007

لا تكذب الأساطير حين تقول أن الملل قتل القطة

اولا انا اسفة عن الكام يوم اللى فاتوا ، مكنتش بدخل على النت ولا بعرف اى حاجة فى اى حاجة، وحتى يوم الخميس اللى فات دخلت سايبر عشان ارد على ايميلات مهمة وكتبت تعليق واحد لأنى مش ببقى مرتاحة وانا قاعدة فى الاماكن دى

عموما ادعو لى الشركة بتاعة الدى اس ال تفرج عن النت وتجيبه عشان فصلاه بقالها اربع ايام وشوية

ثانيا، انا فرحانة جدا ان فى حد لسه بيفتكرنى ويبعت لى تاج.. ام العيال واحمد ، افتكرونى وبعتولى نفس التاج .. طيب انا ليه متصورة ان الناس ناسيانى.. والناس هما البلوجرز يعنى.. دا لأنى من فترة كده تعدت الكام شهر بقيت مهملة اوى فى متابعة البلوجات، وبكتفى بالدخول على المجمع وكل كام يوم كمان، ولما بقرا حاجة وتعجبنى بكسل اكتب تعليق، وبالتالى بقيت احس انى منفصلة عن المدونين وانهم بدورهم انفصلوا عنى الا من الناس الجميلة اللى كل شوية بتيجى تطل على بنت مصرية ولسه بتفتكرها.. ايه لسه بتفتكرها دى هو انا ممكن اتنسي اصلا :))

عموما انا هاجاوب على التاج ولو انه فى حاجات شخصية زيادة عن اللزوم.. بس مس هقدر ااخر طلب لأم العيال ولا لأحمد


ايه اللي هيحصل لإيميلك لما تموت ؟
انا حاسة انى اتسألت السؤال ده قبل كده.. بس عادى يعنى، يعنى هينتحر ورايا مثلا؟ وللا هيمشي فى جنازتي.. هو غالبا مش هيعمل حاجة

اديت الباس وورد لحد قبل كده ؟
باسورد الايميل؟ لأ.. بس زي ما قلت جي توك بيدخل اوتوماتيك والعيال اخاواتى ثقة يعنى

و أيه كانت طبيعة علاقتك بيه ايه ؟
خلا يعنى انت مفترض انى قلت اه؟؟ ما انا قلت لأ

اسمك ؟
زينب سمير . وبالمناسبة دى انا اسمي مختلف عن اسم اخواتى وووالدى، بعنى هما واخدين اسم العيلة ، وانا واخدة اسم بابا

عمرك ؟
اربعة وعشرين وحداشر شهر
يعنى تحضروا الهدايا بتاعتكو عشان السنوية بتاعتى على الابواب :)

برجك ؟
الحوت،

مجال دراستك ؟
تربية.. بس يعنى حياتى العملية مختلفة تماما عن حياتى الدراسية

شخصيتك نوعها إيه ؟
نوعها ايه ازاى يعنى؟

السفر بالنسبه لك ؟
او بإيدى اسافر كل يوم اسافر، ولو بإيدي ازور كل بلد ازور، ولو بإيدي اغير جو ومكان كل شوية اغير

المود بتاعك ؟
مشمشي... ايه يا خويا الاسئلة الدلعة دى

وقت فراغك بتعمل فيه ايه ؟
زمان لما كان عندى وقت فراغ كنت بسيبه فارغ ودا كان بيقتلنى.. ودلوقتى انا مش فاضية خالص ودا بردو بيقتلنى بس رويدا رويدا كده

أمل لسه رزعانى كلمة اول امبارح بسبب الحكاية دى.. وانا من يومها مخنوقة بجد من نظام حياتى دلوقتى

الاكلة المفضلة ؟
انا بحب حاجات كتير
ومش هعرف افاضل بينهم
كل حاجة فى وقتها وزمنها ولما ييجي لي نفس ليها بتبقى هى اكيد افضل حاجة

الصفات اللي خدتها من بابا ؟
ما اخدتش حاجة تقريبا

الصفات اللي خدتها من ماما ؟
ولا ماما كمان، مش فاكرة انى زيهم فى اى حاجة.. مع احترامى وحبي الكامل ليهم

اكتر 6 حاجات بتكرهها ؟
امتنع عن الاجابة
مش لأن مافيش.. بس لأن الحاجات النوع ده من الأسئلة خنيق اوى

اكتر 6 حاجات بتحبها ؟
انظر الاجابة السابقة

الشغل بالنسبه لك؟
مش حياتى ولا روحى ولا اللى بتمنى اعمله طول حياتى.. انا عايزة حياة حرة اكتر من كده مافيهاش شغل ولا تعب ولا مجهود ولا سعي.. عايزة الاقى كل يوم مية حاجة جديدة اعملها و مية حاجة جديدة اتعلمها ومية مكان جديد اروحه وناس كتيرة منهم اهلى واصحابي يكونوا دايما معايا ودايما سوا / مش مقضينها تليفونات وعتاب واعذار وخروجاية كل فين وفين.. انما اي شغل فى الدنيا حتى لو كان بدايته هو شغلك فى اللى بتحبه او هوايته بيتحول مع الوقت لروتين وملل.. الشغل هو الشغل، لكن لا غنى لي عنه بردو ، لانى لو قعدت منه مش هلاقى حاجة اعملها نظرا لأن الحياة اللى عايزياها لا تتحقق الا فى الجنة ونعيمها ان شاء الله

حد ادبسه فى التاج من بعدى
سوري للمرة التانية هخلى التاج يقف عندى وما يلفش
مش تقطيع ارزاق ولا حاجة.. بس اهو تجديد فى نظام التاجات.. بعيدا عن الملل :)

18 comments:

  1. ل اللى قتل القطة يا زيزى مش الملل
    ;)
    curiosity killed the cat

    ReplyDelete
  2. صباح الخير يا بلبلة
    انتى كده بتبوظيلي الاسطورة بتاعتى
    ;)
    انا عارفة ان هو الفضول بس انا عايزة الاسطورة المرة دى تخلى الملل هو اللى قتل القطة وعليه فعلت الاسطورة ما اريد
    :))
    فهمانى
    زى ما اقولك ان القطة بتسع ارواح
    او الناس بتخاف من القطة البمبى بالليل

    ههههههههههه

    ReplyDelete
  3. ياااااااه...زمن..

    فعلا هوا الفضول الى قتل القط بس الملل

    بيقتل الارواح...ودة العن ميت الف

    مرة من موت القط..اجاباتك جميلة

    وصادرة من نفس تعلمت ان تضحك حتى لا

    تبكى...تحياتى اليكى ...

    ReplyDelete
  4. انا أسفة يا زيزي ان كلامي خنقك .. بس بجد انا خايفة عليكي .. مش هقدر أوسع ف الكلام أكتر من كدة هنا بس أكيد لينا كلام تاني علي الشات أو ف التليفون .. انا أسفة تني يا زيزي .. ما تتضايقيش مني ..

    اهم شئ بقي .. عملتي ايه ؟ ما طمنتينيش يعني ؟ طمنيني هه !! و الله بحبك يا زيزي ..

    ReplyDelete
  5. .:.-=- ELGaZaLy-=-.:.

    شكرا على كلامك
    بس حكاية انى اتعلمت اضحك عشان مابكيش لسه بدري عليه شوية :) ما اعتقدش ان حياتى مأساوية للدرجة دى، بالعكس انا سعيدة بيها وبكل اللى فيها حتى لو الششغل بيضيع مى حاجات دلوقتى ، بس انا هحاول استعيدها وارتب حايتى من جديد
    يعنى لسه ببكى لما ابك ىولسه بضحك لما بضحك
    :)

    ---


    امل
    اسفة على ايه يا كوكى، انا مش ممكن اتضايق منك ابدا
    وانتى يعنى لو منبهتنيش لحياتى مين تانى هيقولى؟
    ربنا يخليكي ليا :)

    ReplyDelete
  6. العمل صار مشكلة المشاكل لانه اولا صار روتيني بدرجه غير معقوله و ايضا يخلو من المتعه كما انه يخلو من اهم شيء و هو الاجر المناسب الذي يتيح لفردفي اجازة الويك اند انه يفردها شويه
    لو فردها بالمرتب الحالي انشاء الله كده مش هيعرف حتي يلمها باقي الشهر

    ReplyDelete
  7. زيزي يا جميله كنتيي فين يا هنادي
    اولا شكرا لتلبيت دعوتي
    ثانيا محدش يقدر ينساكي يا جميل هو في حد عمل مدونه من غير ما يكون عدا عليكي
    والله في ثلاثه غالين عليا اول مره عرفت التدوين عن طريق احمد شكير اول حد علق حلم الجميله اول حد ساعدني اعمل بلوج زينب البت المصريه الجميله و الي مالوش خير في قديمه ملوش خير في حد
    عودا حميدا

    ReplyDelete
  8. معقولة يا زينب فلتي من قانون الوراثة عظيم:))ا

    ReplyDelete
  9. I have a video I would like you to see and hear. i am also interested in hearing your feedback on my blog.
    http://egyptiankangaroo.blogspot.com/

    ReplyDelete
  10. جميل جدا إني أقرا كلام زي اللي انتي كتباه في مدونتك المتميزة فعلا ، وأجمل ما فيه إن روحك البديعة طلة من سطوره.
    هاني

    ReplyDelete
  11. ياه يا زيزي .. أخيرا سمحتي للأنمنيموس الغلابة بالتعليق عندك
    المهم يا ستي انت دمك خفيف جدا (بدون ابتزال)
    مثقفة بجد (يعني أي حد يفكر يشتري كتاب اسمه التفسير الماركسي للاسلام لازم يكون مثقف D:)
    أنا من متابعينك الدائمين

    ReplyDelete
  12. ااااااااااااااااااااااااااااااههههههههههههههههههههههههههههههههههه
    كتبت تعليق 100 مره مهم جدا وطوييل جدا جدا وبيحصل ايرور
    عملت سابي وعملتله كوبي
    بعد الايرور جيت اعمل بيست منفعش

    ReplyDelete
  13. اختى بنت مصريه انا جديد فى عالم المدونات ولم استطع فهم شرحك لعدم ظهور الصور مع الشرح اريد ان اعرف كيفيه اضافةاغنيه ومدونات وشعار الحملات
    مع الشكر

    ReplyDelete
  14. انا كمان عاوز نفس الطلب اللينكات للاغاني و الصور مش مفهومه ياريت تعطينا نماذج و مواقع
    و لكي خالص الشكر

    ReplyDelete
  15. السلام عليكم ورحمة الله
    ما بعرف ليش كنت متخيلة انو عمرك اكبر بكتير
    يمكن لاسلوبك في الكتابه ؟؟

    تعرفي شو اول شي بعمله الصبح لما اوصل على الشغل مع فنجان القهوة ؟؟ اني ادخل على مدونتك
    مواضيعها شيقة
    ولما ما بلاقي موضوع جديد .. بدور في الملفات القديمة
    بتمنالك يوم سعيد
    Queen of Peace

    ReplyDelete
  16. أرجو منكم تفضلا مطالعة هذه المدونة الجديدة:

    http://basedon-truestory.blogspot.com/

    ReplyDelete
  17. المشكلة مش فى الملل المشكلة ان فى ناس حتى مش لاقيه الملل ولا قادرة تلحق بالحياة ناس كده عايشه على الهامش
    معلش بقى انا مدون جديد اوى ممكن تقولولى
    يعنى ايه تاج
    mazaag.blogspot.com

    ReplyDelete
  18. والله يا جماعه رغم ان بقالي اكتر من 11 سنه بستخدم الانترنت بكل ما فيه الا اني لاول مره اكتب في مدونه

    وده راجع لاني يمكن موش فاهم كويس فكرة المدونات بصراحه بس عموما بيشدني اي مكان بيبقى فيه تجمعات عارفين بعض

    نايس وورك

    ReplyDelete