9/04/2007

المنط التاريخي: تدوينة لاستنباط نوايا الشعب

مع الاعتذار لأخونا العزيز بن عبد العزيز وتدوينته : المناط التاريخي: دراسة لمعرفة مقاصد الشريعة- الكلمتين الجايين ملهومش علاقة بتدوينته. هو بيتكلم عن المناط التاريخي،وانا يحضرني الآن المنط التاريخي

والمنط التاريخي هو -لمن لا يعلم- بؤرة زمنية تحدث كلما وصل نظام حكم استبدادي إلى نهايته بدون تدخل -لا مباشر ولاغير مباشر من المحكومين -الشعب يعني- بمعنى أنها إرادة القدر التي تتدخل ليموت الحاكم او يمرض او تطارده الشائعات مع ان" صحته زي الفل"

ومن هنا نلاحظ ان نظام الحكم الاستبدادي هو في نظر الشعب مرتبط دائما بشخص الحاكم الفرد، فحياته هى استمرار للنظام وموته هو موت النظام، بالضبط مثل الفتوات

وهذه البؤرة -المنط التاريخي- يستغلها غالبا الشعب بثورة هى هياج فصامي (!!) ناتج عن اصابة الشعب بصدمة عصبية نتيجة احساسه ان الراجل هينزاح والهم هيروح، حاجة كده زي اللى يستقوي اول ما يحس ان سيده ضعف فجأة، زي بالظبط ماجدة في الفيلم اللى كانت بتقول فيه لذكي رستم "عمو عزيز" وبعدين اتجوزها وكده. ولما الحصان بتاعه هجم عليه وموته كانت بالنسبة لها منط تاريخي هايل انها تتخلص من البيت اللي حبسها يه وترجع تعيش حياتها.

لا نقول ان المنط فرصة مثالية، ولكنها فرصة الشعوب الخيبانة دائما. لذلك توقع البعض ان الخبر الغير مؤكد / الشائعة الشبة اكيدة عن مرض الرئيس وربما وفاته ستكون بمثابة الاشارة "لطلوع" الشعب فى الشارع - تتزعمه (وتتنازعه) قيادات ستظهر فجأة- مسقطا ستة وعشرين عاما من حكم العائلة المباركية، محاولين القضاء الفوري والعمياني -بكل خوف وهياج وعشوائية- على أنصار العائلة من وزراء موالين وجهات حكومية موالسة وكيانات صحفية واعلامية متواطئة وهراوات وأقسام شرطة ومعتقلات وغيرها من رموز الحكم المباركي

لن نخوض في سلبيات الحياة ما بعد المنط وكيف انها فى الغالب سترسي العطاء على حزب جديد او مجموعة افراد في ظل موجة عمياء الشاطر فيه اللى بيعرف يقول بؤين حلوين يظبطوا بيها دماغ الشعب ويحصلوا على موافقته ويقيمون دولتهم الجديدة على رفات نظام مات لوحده ودون تدخل منهم او من الشعب اللى بالضرورة سوف يعاني -اكتر من نظامه القديم- اللى هيعمله فيه نظامه الجديد..ويا ساقية دوري مايهمكيش من البقرة المتغمية

الا ان الملاحظ يا سادة، ان حتى القاعدة الشعوبية اللى هي المنط التاريخي لم يكن لها مفعول علينا فبرغم شعورنا الداخلي بأن شيئا ما "سيريس" يحدث لحاكمنا إلا اننا لم ننط بعد ولم نستغل البؤرة الزمنية ولم نحرك ساكنا، كأن على رؤوسنا العادلي، وكأن طاقاتنا استنفذت في الصبر ، ونجيب الطاقة منين والسكر غلي

ملحوظة: التدوينة تخاريف ما قبل الصيام، كل سنة وانتو طيبين

25 comments:

  1. حلوة منط أوى ههههههه
    بس يا فرحة ما تمت
    انهردة جابوا كام لقطة فى نشرة القناة الأولى طالع فيهم الريس ما شاء الله زى الفل
    لما نشوف آخرتها ايه فى الفلم اللى احنا عايشينو

    ReplyDelete
  2. كلام جميل ومهم .. بس الأهم لمين .. وهل الناس ضعيفة لدرجة إنها تستنى منط ييجي أو لأ .. ولا قوية لدرجة إنها تكون هي المنط
    لك تحيتي

    ReplyDelete
  3. حلوة الفكرة

    أصل الخروج من المطب التاريخى لازم يكون من خلال منط تاريخى

    ReplyDelete
  4. This comment has been removed by the author.

    ReplyDelete
  5. ولا حد اتحرك لما قالوا ان حسحس مات ... بالعكس .. الناس قعدوا فى بيوتها مستنيين ايه اللى حيحصل

    و كل واحد بيقول مفيش فايدة

    ReplyDelete
  6. تمتلكين مفردات غير نمطيه او ربما لا تمتلكينها ولكنك تصنعيها ...اسلوبك ببساطه اقرب الى منطقة الكلام الممنطق اصلا ولكن انت تمارسين عليه نوعا من تنميطه
    اى جعله نمطياً
    فيصبح مناط الكلام منطقيا وفقا للنمط الزينبى الخاص اللى هو نمطك

    فهمتينى ؟؟؟؟؟؟؟؟
    طب سيبك من اللى فات مع انه مش تخاريف والله
    لكن انت ابدعتى ومش تخاريف قبل الصيام ولا حاجه
    مع ان اسلوبك فى الكتابه كان يعكس انطباع عن شكلك غيرك خالص لما شوفتك فى المهرجان

    تحياتى
    ان رجعت ادون

    ReplyDelete
  7. wel sokar 3'ely we ana 2a7aly be eih :)
    kol sana we enty tayeba :)

    ReplyDelete

  8. بس المرة دي المنط عالي والحفرة عميقة

    خدي بالك

    تحياتي لك من ماناساس البلد

    ReplyDelete
  9. عجبني قوي الاستدراك اللي ف اخر التدوينة .. أهو الاستدراك ده اجابة سؤالك يا جميل .. اللي راح راح يا عم الحاج !!

    ReplyDelete
  10. المنط التاريخى
    اذا واجه فجوة زمنية غير محسوبة ..يجعلنا بالتبعية نواجه آلام انسانية لم تكن على البال او الخاطر
    ...
    فاذا جاءت تلك النطة التاريخية محسوبة المسافة والسبب اى لماذا ننط هل لتفادى حفرة غائرة تأخذنا الى مستنقع مظلم ..ام لتفادى حاجز عالى يحجب عنا الضوء..فالبتالى ستتوافر لدينا المعرفة اللازمة التى تجعلنا قادرين على النط مرة اخرى فى الوقت المناسب فلربما يكون الطريق الجديد الذى وصلنا اليه بفعل النطة السحرية العفوية التاريخية طريق وعر للغاية ويحتاج الى المزيد من النط مما يتطلب منا معشر البشر ان نعيش كالسوبر ماريو ينط كثيرا كى يتغلب على عقباته ويستكمل الطريق
    .........
    فى النهاية اقول ان هناك منط تاريخى يصحبة قفزة عالية الى مستوى اعلى ومتميز وهناك منط يصحبه تنطيط ولطم وخنقة .....يكفينا ويكفيكو شر النط والمنطات
    ****
    اسف للاطالة

    ReplyDelete
  11. يسرني ان اتقدم بخالص التهاني وأطيب التمنيات
    لكم والأسرة الكريمة والأصدقاء
    بمناسبة حلول شهر رمضان المبارك ،
    أعاده الله علينا وعليكم وعلى مصرنا الحبيبة
    بالخير واليمن والبركات
    تقبل الله وكل عام وانتم بخير

    ReplyDelete
  12. ربنا يعمل اللى فيه الخير وانتو طبعا فاهمين

    ReplyDelete
  13. خلاص مفيش فايده تقريبا
    لان الراجل حاطط وراه واحد يمنع الناس انها تعمل كده و له عيون مخيفه و له جهاز شرطه سمعته بقت زي الطين
    ازاي الشعب يتجرا و يعملها
    ؟

    ReplyDelete
  14. لو علمتم الغد لطلبتم الواقع
    محدش عارف فية اية ولية وامتى
    سامعة منى الشاذلى فالعاشرة مساءا الان بتقول بقدر كبير من الصراحة وقدر اكبر من الحرص وتغمز بعينيها
    وهذا ما اود فعلة ههههههههههههه شكرا

    ReplyDelete
  15. نتمنى أن يكون هناك "منط" خاص بالرؤساء اللي بينطوا ع الحبل ومدوخينا معاهم

    مدونة جميلة جداً .. طرحك قريب من القلب و .. العقل

    يسعدني "منطك" إلى جارتك العبدة الفقيرة لله في

    www.dejavupress.blogspot.com

    وقبل أن أذهب اريد تسجيل اعجابي الشديد بصورة اللوجو الخاص بمدونتك

    ReplyDelete
  16. شاركونا بأراءكم فى أرضنا

    أرض النساء

    مجتمع النساء كما حلمنا به

    http://landofwomen.blogspot.com/

    ReplyDelete
  17. انا لا اجيد القفز
    ربما الجئ الى البكاء

    ReplyDelete
  18. المنط المصرى بيقول الى يتجوز امى اقولة يا عمى على راى عمنا ابراهيم عيسى كل البلد قالت خلاص مات الريس طيب نشوف ونستنى مين اللى بعده وحتى لو اللى بعده جه ب99 فى الميه برضو عادى ما احنا خدنا على مبدا عش المللك مات المللك ويا خوفى لا تبقى مملكة

    ReplyDelete
  19. كل سنه وانتي طيبه وبخير
    بس هو مش كلام تخاريف ولا حاجه
    اي شعب في الدينا بيربط بين الحاكم نفسه وبين صلاح او فساد البلد بس الشعب المصري حصلوا صدمات متتكره بسبب لقمه العيش اللي بيحارب عشان يحافظ عليها زتفضل تتدخل بيته مباقش يهمه حاكم يجي ولا يروح اللي بيعمل الضجه هما الناس اللي يهمكم في المقام الاول تغير الحكم والحاكم ام الشعب نفسه فهو مع من يوفر له حياه افضل مات ولا عاش ولا راح في ستين ...مشوار ورجع تاني

    ReplyDelete
  20. برافو برافو برافو ان ا هصنف البوست ده احسن بوست قريته لما يجيلي تاج :)
    تحياتي

    ReplyDelete
  21. كلم جامد وغريب بس شغال
    ربنا يوفقكم
    وكل عان وأتي بخير

    ReplyDelete
  22. الشعب برة الليلة دي ... المنط التاريخي ما بيستفيدش منه غير اللي بيعرفوا يقولوا البقين بس
    لكن الشعب لا يمكن يشارك في هذه النطة الجريئة إلا لو مالقاش اللقمة بشكل مفاجئ... والكبار اتعلموا ازاي يمنعوها بالتدريج كمان
    لو كل اللي بيتكلموا في السياسة عاشوا نفس حالة الناس البسطا .. ساعتها هيصدقوهم بجد ... وهيساعدوهم في النطة دي ...بس للأسف .. كل اللي بيتكلم في السياسة مرفه..مقارنة بغالبية الشعب البسيط

    ReplyDelete