12/03/2013

اللستة

زي ما ناس كتير بتعمل، نفسي في مرة أعرف أكتب لستة بالحاجات اللي عايزة أعملها في حياتي. بس كل مرة بتخض ومابعرفش أكتبها. بلاقيني مثلا ابتديت أكتب أمنيات تبدو إنها صعبة النهارده أو مستحيلة، وابتدي أفاصل مع نفسي، أقول لازم أفكر في اللي أقدر أعمله بطولي من غير ما تكون الأمنية متوقفة على حد أو فلوس  أو ظروف غير متاحة. أرجع وأقول ﻷ أكتب اللي نفسي فيه وبعدين أبقى أفكر أحققه إزاي. وبعدين أقول لأ طب ما ابتدي برغبات قصيرة المدى الأول.. ولو كتبت حاجتين تلاتة بابتدي أقارن بينهم وألاقي إن تحقيق واحدة منهم يخلي التانية مستحيلة، وأبقى مش فاهمة أنا بتمنى الحاجات دي إزاي مع بغض..وأزهق وأقطع الورقة أو أمسح الفايل وأنسى الموضوع.

مثلا أنا عارفة إني نفسي أعمل بيت صغير دورين بجنينة ويكون قريب من بحر. وفي نفس الوقت عايزة أقعد بره مصر كام سنة كده، وفي نفس الوقت عندي حلم إني أزور كل الأماكن المقدسة لكل الديانات، كل مكان الناس بتعبد فيه ربنا.. و نفسي أتبنى طفل.. ونفسي أشتغل على مشروع يخدم محو الأمية.. وحاجات كتير مكلكعة كده، يا إما محتاجة فلوس بالهبل أو محتاجة وقت، أو محتاجة بابا وماما يوافقوا الأول

أديني اتنرفزت أهو وأنا بفتكر كام حاجة من لستة طويلة عريضة عمري ما كتبتها..

بس أنا لازم أعمل الموضوع ده. لازم أخطط العشرة خمستاشر سنة الجايين. مش عايزة آخر سنين شبابي يضيعوا من غير ما (1) أكون عملت حاجة مفيدة (2) واتبسطت شوية.

No comments:

Post a Comment