بمساعدة أرشيف المصري اليوم تكونت لدي صورة أظنها معقولة عن مشكلة مصنع أجريوم المراد انشاءه في دمياط. والحكاية إن..
- تتبع أحداث:
في الربع الأول من سنة 2006 تم عقد الجمعية التأسيسية الأولي لشركة اسمها "أي- أجريوم". هذه الشركة سوف تقوم بانشاء مصنع بتروكيماوي.. مهمته انتاج "اليوريا" واليوريا "تستخدم كسماد وكذلك مادة أولية لتصنيع مادة اليوريا فورمالدهيد والميلامين كبديل للأخشاب الطبيعية، الأمر الذي يوفر المادة الخام اللازمة لإقامة العديد من الصناعات التكميلية للمنتجات الوسيطة"
كلام حلو الصراحة.. كمان المصنع هيتم بناءه في إطار "الخطة القومية للبتروكيماويات" واحنا طبعا بنشجع كل الخطط القومية.. وخصوصا اللي تتكلم بالارقام الكبيرة زي ان الطاقة الانتاجية للمشروع 2.1 مليون طن يوريا بتكلفة 850 مليون دولار على مساحة أرض 900 ألف متر مربع وتوفر 2500 فرصة عمل..
- قوم تمر الأيام والليالي وبعد سنة وربع كده، تحديدا في يونيو 2007 نقرا عن قرض من البنوك لتمويل المشروع ورغم ان الارقام اختلفت زي ان التكلفة هتصل 1.3 مليار دولار بس طبعا يعني بعد سنة وربع.. دا الزيت زاد اكتر من الضعف في شهرين تلاتة.. انما الغريبة ان الطاقة الانتاجية هتكون 1.3 مليون طن يوريا بس يمكن تكون لخبطة أرقام من المصري اليوم :$
- بس بعد نص سنة، في نص يناير 2008 قرر محافظ دمياط انه يوقف العمل بالمشروع أولا "بسبب انعكاساته على البيئة" وثانيا "لأنه اكشف ان الارض المقام عليها المشروع محمية سياحية"
طبعا الشركة ماسكتتش.. ووزارة البترول ماسكتتش.. وبيأكدوا ان الارض محمية سياحية وان المحافظ على علم بعملية الشراء وانهم اخدوا موافقة وزارة الزراعة وانهم بالفعل صرفوا قد كده ي مرحلة البناء وان الشركة بتخسر دلوقتي بسبب التوقف وان مصنع اليوريا غير مضر بالبيئة وان شركة معرفش ايه الخاصة بدراسات البيئة اكدت ان المصنع طيب وابن حلال. وكمان -ولاحظوا الارقام تضخمت ازاي- المشروع ده هيوفر 15 ألف فرصة عمل وهيستهلك رقم خرافي من الغاز الطبيعي ودا كله مكسب لمصر وان الارض مش محمية سياحية ولا حاجة"
دا كلام الناس اصحاب المصنع واللي وافقوا ع المصنع..
من ناحية تانية:
- مجلس محلي محافظة دمياط ومجالس المدن والمراكز والمجتمع المدني وجهاز شؤون البيئة وإحدي الجهات السيادية (معنديش فكرة ايه الجهة دي) معترضين علي مكان المشروع لتعارضه عملياً مع تأمين الميناء. المصنع هيقام في رأس البر (اللي هي اصلا منطقة سياحية زي ماا حنا عارفين.. بحر ومصيف وشماسي وكده.. يعني ناس يعني)
-عميد كلية سابق- بيأكد ان إن المشروع يهدد جزيرة رأس البر وبيقول ان جميع القوانين والتشريعات البيئية تنص علي أن المصانع الخاصة بالأسمدة يجب أن تبعد عن المناطق السكنية بنحو ٧٠ كيلو متراً. ودا مش حاصل في حالة مصنع أجريوم
- وأستاذ أمراض النبات بيقول ان المصنع بيستخدم مواد متفجرة كافية للقضاء علي أي مدينة محيطة بها وكذلك القري عند حدوث أي خطأ أو إهمال.
- وأحد نواب مجلس الشعب قدم استجواب وبتاع
- وقام محامي بتقديم بلاغ للنائب العام ضد اللي وافقوا على المشروع وبيطالب باصدار بيان من الجهات المعنية لمعرفة حقيقة المشكلات البيئية اللي ممكن تحصل
- وبتاريخ ستة مارس "تظاهر المئات من أهالي دمياط والسنانية ورأس البر .. خوفا من تعرضهم لأضرار صحية بسببه.. وأغلقوا الطريقين الشرقي والغربي المؤديين إلي رأس البر وأشعلوا إطارات السيارات وألقوا الحجارة علي قوات الشرطة. وكمان قوات الأمن ألقت القبض علي ٢٥ مواطنا بتهمة التجمهر وتعطيل المرور. واللي وصلني بشكل مباشر ان أمن الدولة شخصيا تدخل لتهديد بعض الناس اللي كانوا في المظاهرات.. "شوية داخلية بأه"
- درية شرف الدين كتبت عن الموضوع مقالة تستحق القراءة
تقول لمين يقول الحقيقة.. واحدة زيي منعدمة الثقة في النصابين اللي ماسكين الحكومتنا.. مش ممكن تصدق انهم ملايكة عايزين يفيدوا الناس بمصنع يوريا.. طبعا اسهل حاجة ممكن تتعمل ان وزارة البيئة تقول اوكى ع المصنع حتى لو كان هيصدر لنا في المستقبل سرطان بالهبل.. ودي اسهل حاجة عند الحكومة.. مش هي بردو اللي ترعرع في حماها يوسف والي واللي مستشفى سرطان الاطفال ومعهد الاورام عمرانين على حسه....
الدمايطة
الدمايطة اشتكوا
والشراقوة اشتكوا
والصعايدة اشتكوا
والسواحلية اشتكوا
والجيزاوية اشتكوا
والإسكندرانية اشتكوا
حتى المنايفة اشتكوا .. الجميع اشتكى والجميع سلم بأن فقط فقط .. الشكاية هي الحل
هو من الواضح ان
هو من الواضح ان أظرف البركه التى تصرفها حسابات المصنع قد توقفت
نملك في وطننا
نملك في وطننا مصنع مشابه للبرتوكيماويات
وهذا المصنع تم رفض قبوله علي اراضي الخليج بأكملها ولم ترضي به الا اراضينا
نعم مردوده المادي داعم للاقتصاد ووظف فيه الكثير من البشر برواتب محترمه
لكن الاضرار البيئيه وعلي البشر هي ما دفع الكثير لرفضه
الله يكون بعونهم
حاسس إن في ناس
حاسس إن في ناس بتلعبلي في ذكرياتي..
بورسعيد الجميلة في التمانينات ، كازينو "كاستن" بتاع نجم المصري القديم مسعد نور .. والبحر والشاليهات.. الحمد لله ظهرت قرى سياحية تسد عين البحر واتعمل ممشى واتسابت مساحة ضيقة جداً اسمها شاطئ بورسعيد.. أما الشاليهات فانتقلت إلى رحمة الله تعالى..
راس البر.. قصة الحب الوحيدة والحالية في حياتي طلعلها حبايبنا الحلوين عايزين يجيبوا أجلها هي الأخرى.. ربنا يستر..
ما يجوش دول على الذكريات الهباب اللي في حياتي ويخلصوني منها ويوروني فيها يوم.. أكون ممنون للناس دي لو عملت كدة!
شكرا يا زينب
شكرا يا زينب على توثيق الموضوع، وجدته مفيدا جدا.
و الدمايطة برافو فعلا؛ بهروني زي ما علقت في مكان آخر.
لما انتي محموقة
لما انتي محموقة اوي على مصنع اجريوم الي هيتعمل في راس البر مع اننا عارفين ان نسبة السكان في راس البر مش كتير اوي يعني ... حضرتك ولمؤاخذة يعني متكلمتيش على المصانع مش المصنع ... المصااااااااانع الي في منطقة حلوان الي نسبة السكان فيها ماخدة ربع سكان مصر وفيها مصنع الاسمنت ومصنع الحديد ومصنع الحربية ومصانع تانية الناس هتمووووووووووووت من المصانع دي وانتي بتتكلمي في مصنع اجريوم طيب احنا نحل المشكلة بشكل عام احسن ما نحلها بشكل خاص يعني بدل ما يشيلوا المصنع اجريوم بس احنا نشيل فكرة انشاء المصانع في وسط المدن من دماغهم اساسا... هقول اية بس ... مافيش حاجة تتقال والله
اذا كنت بتوزن
اذا كنت بتوزن حجم قضية بعدد البني ادمين الي هيتئذوا، فدي تبقى موازنة خسرانة.. وظالمة. واذا كنت انا اتحمقت عشان مصنع اجريوم، انت ممكن تتحمق عشان المصانع اللي انت بتقول عليها وتسمعنا صوتك... واذا كان معندكش حاجة تتقال يبقى تخلي كل واحد يختار القضية اللي يهتم بيها، حتى لو كل الاهتمام بينحصر في تدوينة حكي او بانر متعلق في مدونة.. طبعا كان الافضل انك تفكر بشكل ايجابي اكتر وتقول ان اجريوم خطوة جيدة لحل مشكلات المصانع الموجودة في الاماكن السكنية ان انجاحها ممكن يكون عامل مهم لتشجيع الناس وتعرفيفهم بكل المصايب التاني الل في حلوان، لكن لأ.. حضرتك داخل تحط تعلق استنكار وبس.. ودا شي معنديش عليه تعليق
حضرتك بتتكلمي
حضرتك بتتكلمي على اية بالظبط؟؟ على حل المشكلة ولا على اذا يعملوا مصنع اجريون في وسط المدينة؟؟؟ طيب انتي مافكرتش في الناس الي في حلوان مثلاً والمصانع الي هناك قبل ما يعملوا مصنع اجريوم برأس البر ... ولا انتي مفتكرتيش ان دي حاجة غلط الا لما عملوا مصنع اجريوم؟؟؟ ما هو برضوا الموضوع كبير وانتي فكرتي عن الموضوع ولما ظهرت مشكلة قدامك ... احنا لو كنا اتكلمنا عن مشاكل مصانع حلوان مكنوش فكروا في مصنع أجريوم ولا أنتي إية رأيك؟؟؟
بقولك إيه من
بقولك إيه
من الآخر
و شيل إيدك و سيب بُقي
كده اتاخر
آديني باقولها م الآخر
كلام الليل
ما لوش آخر
كلام لا يجيب و لا يودي
كلام ف كلام
لحد الضلمة ما تعدي
كلام مدهون و بالسمنة
و لما الصبح بيصبح و لا توفيش
حروفه تسيح و قدامنا
بالاقي قفايا و أنا راجع يأمر عيش
و الاقي كلامك الجبار كلام عادي
طاحونة يا ناس و شغالة على الفاضي
و طول الليل ماسك ودني
و دو دو دو و توعدني
تعممني
لأ اطمن ما فيش حاجة
ما فيش مصنع
تسجدني
و هي بلدكو محتاجة
مدام ها يضر و لا ينفع
كده كفاية
كفاية حرام بقى كفاية
كفاية حشيش و كباية
كده كفاية
عشان خاطري
عشان بنتك عشان ابني
بلاش مصنع
مدام ها يضر و لا ينفع
باسم الدين و باسم النخوة و الأخلاق
عشان سلمى عشان محمود عشان نجلاء
عشان سارة عشان حلمي و الا هناء
أبوس إيدك
عشان الوردة ما تفتح في جو نضيف
أبوس رجلك
عشان السل ما يعشش في حضن الريف
تعالى زيارة ويايا
و شوف بكره كده معايا
دي سارة فاكرها عملت لك مشبك أيوة و الا فطير
و شوف حلمي اللي كان بالأويما يعملك دولاب و سرير
أديه نايم شوف المنظر
بعد عنك ما جاله السل م الدخان
و سلمى نايمة و الكنسر
مخلي حياتها ذل ف ذل ويا هوان
يلا قوم و خليهم بقه يغوروا
على غيرنا يروحوا يلفوا و يدوروا
يلا و لم يا كندي و شيل من هنا سمومك
و لم اللي وقع منك فلوسك يلا و هدومك
و لم ديولك الألاضيش و خد عليهم المزة
أراهنك لو ف تل أبيب يوافقوا تعمله في غزة
و خليني و خلي لي هوايا الصافي و المية
و خليني كده بعبلي أفطر فول و طعمية
كفاية خلاص كفاية سكوت
خلاص حاسس بإني هـاموت
كفاية سكات سنين فاتت
و رحمة امي ما انا ساكت
ما فيش مصنع
ما فيش مصنع
لا انا ساكت و لا ها ارجع
ما فيش مصنع
و لو ناوين على موتي
مش ها افضل على سكوتي
و آديني باقولها م الآخر
و شيل ايدك و سيب بقي
كده اتاخر
لا انا ساكت و لا ها ارجع
ما فيش مصنع
ما فيش مصنع
ما فيش مصنع
وجود هذا المصنع
وجود هذا المصنع الكندي يهدد حياة الجميع لذلك تكاتف شعب دمياط بصورة لم يسبق لها مثيل للدفاع عن بلدهم فنجد مظاهرات الدمايطة خليط كبير من أحزاب المعارضة والحزب الوطني والاخوان المسلمين والمجالس الشعبية والمحلية والأهالي كلهم يحملون اللافتات كلهم نسوا خلافاتهم الأصلية وأصبح هدفهم الأول هو حماية بلدهم وأبائهم من الخطر
لكل محبى دمياط
لكل محبى دمياط ومسانديها فى أزمة أجريوم يمكنهم التصويت والتوقيع الكترونيا لرفض مشروع أجريوم على الموقع التالى http://www.domyat.net
تعلـيق