انت وعيالك والمركبة الغرقانة

واحنا صغيرين الحاجات بتكون بسيطة وواضحة، بنبقى صفحة بيضا سهل اي حد يكتب فيها أي حاجة،

واشهر حاجة كلنا اتعلمناها واحنا صغيرين ان الكدب حرام او غلط او حاجة وحشة ( حسب مرجعيتك يعني).

بعد كده، كل واحد ونصيبه من التربية.. يعني ممكن يكون الاهل كانوا قادرين يعلموا ابنهم كام حاجة كمان، ويمكن لظروف اقتصادية بحتة كبر فجأة من غير ما يخدوا بالهم يربوه كويس.. والأنكى انهم ممكن يكون معندهمش الحاجات دي اللي بنتكلم عنها، من غير زعل يعني، اكيد الحال وصل بينا للدحديرة دي بالتدريج يعني.. جيل ورا جيل

طيب غير ان الكدب حرام، ايه كمان اللي المفروض نكتبه في دماغ ولادنا؟ ايه اللي انت نفسك تعلمه لابنك، ايه اللي انت شايفه ضروري ومهم وحيوي انه يتحفر جواه

ايه اللي محتاجين يتعلموه عشان لما "أحمد" يبقى تلميذ في المدرسة، ويدخل الامتحان، ما يغشش من حد ولا يغشش حد،

ولما يدخل ثانوي يختار المواد اللي بيحب يدرسها مش المواد اللي تجيب له مجموع يتباهى بيه قصاد اصحابه

ولما يبقى فاهم حاجة في مذاكرته، مايبقاش عنده مانع يساعد اصحابه ويشرح لهم،

ولما يدخل "طب" يبقى هدفه مساعدة الناس ويبقى مؤمن ان قضيته الناس مش العيادة وشهادة الدكتوراه على الحيطة.

او لو بقى مدرس عربي يعرف انه دوره الاهم من شرح قصيدة "صخرة الملتقى" هو انه يقدر يساعدهم ازاي يستقلوا بتفكيرهم، ويسألوا، ويدوروا، ويحللوا، ويتناقشوا..

وللا لو فتح سوبر ماركت، والحكومة تغلي سعر السكر عن امبارح، مايقومش هو يبيع السكر بتاع اول امبارح بالسعر الجديد

ولو رسيت على انه يبقى موظف في الحكومة، ما يأخرش مصالح الناس، ويعرف الفرق بين البيروقراطية وبين التسيب والاهمال

وانه لو ربنا قدره ولقى نفسه في منصب او مكان يقدر بيه يتحكم في الناس وارزاقهم ، مايتحولش لطاغية.. ما يبقاش وزير او محافظ او حتى وكيل اول وزارة فيشتغل لحساب الأغنية ويدوس على رقاب الفقرا،

واذا اكرمه ربنا بمصنع حديد او اسمنت، ما يفتريش ع الغلابة ويعرف ان المحتكر هيروح النار

ولما يكون أب ما يفرقش بين ابنه وبنته ، ما يبقاش حتى حاسس من جواه ان ضهره مسنود لمجرد ان عنده ولد وان حيلة مقسوم لمجرد ان عنده بنت

ولما ولاده يدخلوا مدارس ما يضغطش عليهم عشان يجيبوا مجاميع ترفع راسه بين البشر وتخلي رقبته في السما..

ولما ييجي يجوز بنته، يجوزها للولد اللي يطمن عليها معاه، مش اللي يقدر يشتريها بأكبر مهر ويجيب لها اغلى شبكة ويعملها اكبر فرح يتباهوا بيه قصاد القرايب والأغراب، ويحافظوا بيه على برستيج العيلة المصونة

وانه يكون مصدق كل الكلام ده

- تحديث:- نسيت أقولك "شفت ازاي لما انت تبني ابنك ممكن حاجات كتير في حياتنا تبقى افضل؟ لما بس استثمرت وقت ومجهود انك تتطلع واحد صالح لنفسه وليك ولوطنك؟" طبعا ممكن تقول لي: "وافرضي بعد ماربيته وعلمته وكبرته على كل المبادىء والقيم والاخلاق اللي في الدنيا، وجه في يوم قال لي: شفت يا ابويا، اللي علموتهولي مش نافعني، ومش عارف اخد بيه حق ولا باطل مع المجتمع الشرس ده"

تؤ تؤ تؤ، ماتصدقش كلام الافلام ده، والله دا بس كلام افلام، لو علمت ابنك وربيته، واتشرب بالمبادىء والقيم دي، عمره ما يحس ان نفس المبادىء دي بتخونه، بالعكس هو هيكون قوي بيها، مش هيقدر يتخطاها لأنه هيبقى عارف انه بكده هيظلم غيره، وهو طبعا متربي انه مايظلمش غيره. لما يتظلم فعلا، هيحتسب عند ربنا، ويحاول يرفع الظلم عن نفسه، مش العكس ابدا. اللي بيقول ان "المبادىء والاخلاق بتأخره وبتخليه ضعيف وبتهدر حقه اصلا ماترباش عليها، هو سمع عنها بس، او يمكن احتك بيها على خفيف كده.. اصل بردو التربية مش مجرد كلمتين وقعدة وعظ وارشاد.. دي تجارب ومواقف واخطاء وتوجيه و...."