بنت مصريةللنور طبيعة مزدوجة.. والعالم أيضاً

عارف لما يبقى عندك يوم في السنة يخليك تفكر في اللي عملته في سنة فاتت، واللي انت عايز تعمله في السنة الجاية.. وتحسه انه نقطة بداية او صفحة جديدة؟

أنا عندي اليوم ده..الحقيقة أنا عندي ثلاث أيام

أول السنة الجديدة، دا واحد.. وأول سنة 2008 بصيت على 2007 وودعتها كواحدة من اجمل سنين حياتي.. مش واثقة إني هقول كده عن 2008.. لو اتكلمت بحساب المكسب والخسارة انا خايفة أكون خسرت أكتر ما كسبت

ثاني يوم، هو يوم عيد ميلادي.. غصب عني بحاسب نفسي، بفكر في ايه اللي عايزة حقيقي اعمله في حياتي.. والسؤال يبدأ يورم في دماغي... واخر عيد ميلاد دا بالذات كان متعب جدا.. لأن كلكعت في دماغي حكاية إني أنزل استقر في مصر - القاهرة يعني- وكل الأفكار والمقترحات قوبلت بالرفض من أهلي، فضلت كام يوم الدنيا ضلمة في عنيا.. كان أكأب عيد ميلاد مر عليا وبعدين سلمت أمري لله وسكت، وماما اخدتني في حضنها واعتذرت لها اني كنت كئيبة في الأيام دي.. بس بردو من ساعتها وأنا في حاجة طعمها مر في حياتي، احساس بالوضع المؤقت مش قادرة اتخلص منه، احساس خلاني من غير ما أدرى اقفل كل البيبان والشبابيك وافقد قدرتي على التواصل مع اصحاب بحبهم.. وبقي حتى الموبايل بالنسبة لي وسيلة بفقد بيها الناس مش بتواصل بيها معاهم.

ثالث يوم ، هو أول رمضان.. هلت رمضان عليا بتخليني اقول اهيه صفحة جديدة هفتحها اهيه، نقطة بداية اشد بيها سطر ع اللي فات وابتدي من جديد.. نقطة بداية بتديني أمل، ورجاء.. يمكن عشان كده رمضان بييجي شهر واحد في السنة.. عشان كل مرة ييجي افتح صفحة جديدة، ويخلص.. ويرجع ييجي وافتح صفحة جديدة.. وعمري ماكنت فاهمة انا ليه بحب رمضان لما ييجي ولما يخلص.. رغم إني بردو بودعه بشوية بكا

مستنية ليلة اول يوم رمضان بفارغ الصبر.. عارفة اني هقعد مع نفسي.. هقعد مع ربنا.. هيتفتح على قلبي باب جديد.. اكيد هتبقى دعوتي اللي مش همل اكررها طول رمضان: اني ارجع اسلاك وكابلات التواصل مع الناس.. ارجع عندي قدرة اني اتصل وارد على المكالمات.. اني ازور واتزار.. اني اخرج واتبسط وحتى افتح جوجل توك.

---

*عنوان البوست هو عنوان أغنية لأم كلثوم.. الأغنية دي بحبها للست ومناسبة للحالة المعنوية لحضرتي.