كلام الكام يوم اللي فاتوا (1)

زمان.. وأنا صغيرة أوي يعني، قريت في الجرنان حاجة زي ارشادات توفير الطاقة... إنك تطفي النور في الأودة اللي مش قاعد فيها، إنك ماتشغلش أجهزة مش بتستخدمها دلوقتي، يعني ما تسبش التلفزيون مفتوح وانت مش متابعه مثلا.. إنك تستخدم الميه على حسب الحاجة.. وتصلح الحنفية لما تبوظ، أنا فاكرة جملة كانت عن إنه "هتكون في أزمة مياه عالمية في خلال "عدد من السنين" مش فاكراهم طول ما احنا بنستخدم الميه بالهدر ده".. الجملة دي أثرت فيا جدا، وجابت لي "هسس الميه"

"هسس الميه" دي الحالة اللي بوصف فيها نفسي لما أجي أفتح حنفيه، فافتحها بالراحة عشان ما تنزلش ميه كتير، واللي بيخليني لو شفت حنفيه بايظة وبتنقط ميه نفسيتي تتعب واحس بتوتر وإحساس خرافي بالمسئولية.. وابتدي ادور على مين مسئول يصلحها، ولحد ما يصلحها ادور على أي حاجة احطها تحت الحنفية دي عشان تحوش الميه اللي بتترمي دي.. وافرح لما افتكر إني بكده بنقذ العالم من مأساة "المية"

كبرت وفضل الإحساس ده جوايا.. من مجرد مقالة ارشادات عامة في الجرنان، ما بال حملة إعلانات تلفزيونية شغالة دلوقتي.. بتاعة "احسبها صح"

الحملة هايلة جدا في رأيي.. متنفذه صح ولفتت نظر الناس، لأنها كمان مش بتتكلم عن "الأزمات العالمية" واللي الناس مش هتهتم بيها غالبا -سوء وعي لا مؤاخذة- إنما بتتكلم عن "التوفير اللي هينعكس على حياتهم الشخصية بشكل مباشر"

بشكل ما بتتطرح مشكلة وبتدل الناس على الحل، الحل كمان مش معجز وللا صعب.. لما توفر أو تقلل من الأكل الجاهز ، لما تستخدم اللمبات الموفرة للطاقة، أو تصلح حنفية بيتكو اللي بتنقط، إنك تشترى الدوا على قد الحاجة وإنك توفر تمن السجاير

إنك تبتدي تبص على تصرفاتك الإستهلاكية وترشدها..

الحملة بتنور نور لمبة في وعي الناس.. أو أتمنى إنها تعمل كده، إننا ندرك إن "الترشيد" و"التوفير" هما إول فصول عملية في قصص النجاح الشخصية.

أملي في الشباب الصغير والأطفال اللي وعيهم هيتفتح على حملة اعلانات زي دي، كمان ممكن تكون بداية جيدة جدا لدور ايجابي للإعلام، والاعلام دلوقتي هو التلفزيون والتلفزيون هو الاعلام.. مفيش أي وسيلة تانية ممكن يكون لها القدرة على الإنتشار في وقت قياسي وعلى كل المستويات الإجتماعية الا التلفزيون