الحكومة الإلكترونية.. لا نامت أعين الجبناء، أو الله يقل منامكو
"بحرقك لقشك بتأذي بلدك.. مع تحيات وزارة البيئة. يمكن البلاغ على رقم 19808"
"إصرارك على حرق قش الأرز يدمر البيئة ويؤذي الصحة.. مع تحيات وزارة البيئة، للإبلاغ 19808"
دول رسالتين وصلولي من خلال الموبايل.. على مدار يومين تلاتة.
ولنا هنا وقفة..
1- أنا مش مشتركة في أى خدمة إعلانية على موبينيل عشان أي جهة من أي حتة يكون لها الحق تبعت لي أي نوع من أنواع الإعلانات أو التنبيهات.. مهما كان نبل النداء أو أهمية الرسالة، فمش من حق حد "يسبام" موبايل أي حد
دا بيفتح الباب لجماعة "أرضنا الخضراء" و"محبي تامر حسني" و"أنصار الفجر الإسلامي" و"أجندة مصر الثقافية" و"سوبر ماركت الحج عبده" و"مؤسسة محاربي الفن الرديء"... وكل من تسول له نفسه انهم يبعتوا رسايل على الموبايلات
فالمفروض بالذوق كده، الدولة تحترم خصوصية المواطن بتاعها.. وماترتكبش أخطاء زي دي تشجع بيها الآخرين على التحرش الإعلاني بالمواطنين الغلبانيين
2- واضح إن الرسالة خاصة بمحاولات تفادي حدوث "السحابة السوداء" اللي بتظهر في سماء القاهرة المحروسة كل سنة في الأيام.. والحقيقة اكاد اجزم ان دي محاولة فاشلة جدا.. إذا كان هدفهم حقيقي انهم يوقفوا عمليات حرق الأرز
لأن ملوش معنى أبدا إنك تقول للفلاحين "ماتحرقوش القش بليز بليز" من غير ما توفرولهم وسايل تانية للتخلص من قش الأرز، وللأسف جملة " بتأذي بلدك" كلمة ملهاش تأثير -تقريبا- في قلوب الناس.. هتمر على عينهم كده من غير ما يخدوا بالهم.. واللي هياخد باله هيكون شخص من اتنين: هيقول "يحرق دي بلدي، على دي رسالة على دي وزارة.. وهي كانت اديتنا ايه البلد".. او "والله عندهم حق.. بس ما باليد حيلة يعني هودي القش دا فين يعني"
ودا طبعا زي ما احنا عارفين يا حلوين يا بتوع وزارة البيئة دا له علاقة مباشرة بإنخفاض معدلات الانتماء وإزدياد نسب الشعور بالخنقة م "البلد واللي بيحكموها"
3- أسذج حاجة بأة في الرسالة دي هي موضوع الإبلاغ عن عملية حرق الأرز.. يعني مثلا يا وزراة البيئة إنتي متخيلة إن واحد هيروح يبلغ عن جاره عشان خاطر عيون مين؟؟؟ اه.. البلد، قولتولي... ممم
الحقيقة ولا حتى ممكن الواحد يروح يبلغ عن عملية حرق الأرز ولو كان فيها سبوبة - أ ك أ: مكافأة مالية - لأن "مكافآت الحكومة مش مضمونة طبعا"
---
معنديش فكرة إذا كانت وزارة البيئة عملت برامج توعية مثلا لمزارعي الأرز طول السنة اللي فاتت
أو وزعت عليهم مع أنصبتهم من الأسمدة كتبيات تشرح طرق مختلفة لإستخدام قش الارز بدل حرقة
أو وعدتهم بإنها تلف عليهم واحد واحد تاخد منهم القش بمقابل او حتى بدون مقابل
أو - اضعف الإيمان - عملت برامج واعلانات عن خطورة حرق قش الرز، زي اعلانات احسبها صح وانفلوانزا الطيور وكده
إذا كانت الوزارة ماعملتش ولا حاجة من دول.. فتقدر تعتبرهم مقترحات من حضرتي.. حرصا على مصلحة البلد.. وسما البلد.. وصحة المواطنين اللي عايشين في البلد.. وتشجيعا للبحث العلمي في مجال الاستفادة من قش الأرز.. ولتوطيد العلاقة بين الفلاحين ووزراة البيئة.. ولوجه الله العلي العظيم
التعليقات
و ياريته جاي
و ياريته جاي بفايدة الا ان ريحة الدخان اللى شغال من الصبح خنقتني و جابتلى صداع.
لأا انا مبتجليش
لأا انا مبتجليش اعلانات عن قش الرز
انا بتجيلي اعلانات عن تخفيضات في محلات الملابس والكولكشن الجديد وساعات امسكيات رمضان ورسايل العيد والكول تون والحاجات دي
انما جديده بتاعه قش الرز دي اول مره اسمعها
ممم.. يعني اللي
ممم.. يعني اللي انا خايفة منه بيحصل اصلا وانا مش دريانه
الله يكون في عونك يا أختي :(
اعتقد كمان ان رسالة قش الرز دي، موزعة جغرافيا لتشمل المحافظات اللي بتحرق فيها قش الرز.. احم احم.. يعني احنا م الآخر :)
السلام عليكم
السلام عليكم ورحمة الله وبركاته
انت عارفه ايه المشكله ان اصلا الناس هنا ماعندهاش حلول جذريه لاي حاجه
عاملين زي الست اللي بتنضف قدام بيتها فاتشيل الزباله وبدل ما تحطها في صندوق القمامه بتحطها قدام بيت جارتها
ده بالظبط اللي حصل ، من كام سنه كان فيه حمله اعلانيه -ايام ماكان مسلسل سر الارض لسه بيتذاع- عشان الفلاحين يسيبوهم من الفرن البلدي اللي بيستخدمو فيه القش والحطب وحاجات تانيه كانوا دايما بيخزنوها فوق السطوح وكانت دايما بتحصل حرايق بسببه ( فاكره مسلسل عصفور النار ) ، انهم يستبدلوه بالفرن الغاز او اللي بيولع بالكيروسين
وزن زن زن لحد ما فعلا الافران العاديه تقريبا انقرضت
وهنا ظهرت المشكله اللي هي الفلاحين هايعملوا ايه بالقش اللي كانوا بيستخدموه كوقود للخبز ؟؟؟؟؟؟؟؟
خصوصا ان تكلفة نقله من الغيط لمكان البيع او لتصنيعه كعلف للمواشي زي ما اقترحوا عليه اعلي بكتير جدا من انهم يشتروا العلف جاهز فبالتالي جه قرار الحرق عشان يتخلصوا من الكميات المهوله من القش الموجود وشاغل مساحه علي الفاضي
واهو بكده بتوع الدفاع المدني خلصو من مشكلة الحرايق وصدروها لوزارة البيئة علي هيئة سحابة سودا
ولو بصينا علي كل حاجه في البلد دي هاتلاقيها ماشية بنظام الست اللي فوق دي اللي عاوزه تنضف قدام بيتها هانعمل ايه بس
حسبنا الله ونعم الوكيل
معلوماتك جديدة
معلوماتك جديدة بالنسبة لي.. مش عارفة اقول ايه والله.. حسبي الله ونعم الوكيل
إن لم يحرق
إن لم يحرق المزارع قش الأرز .. ما سيفعل به
بصراحة جيتي في
بصراحة جيتي في وقتك عشان الواحد ينفجر في البلد واللي جابوا البلد الله يحرقها بلد بالعصابة اللي بتحكمها بالشعب اللي ساكت وبيسكت وحيسكت لحد ما البلد تولع بينا ان شاء الله وابقي قولي emy قالت
وانتي مبؤءة م
وانتي مبؤءة م البلد وانا مش عارفة يا emy ;) بعد الشر عليكي وع الشعب..
عن نفسى انا
عن نفسى انا عيشه اسود اسبوع فى حياتى من حرق القش ده ليل ونهار بخصوص الاعلانات لاتعليق ياعنى هتيجى على دى وهيحترمونا ولا هيحترموا خصوصيتنا صح كده خصوصيتنا دى الله يرحمك ياعم عبده مات وهو بيحلم باليوم الى هيلاقى واحد من الحكومه تحترمه وتقله ازيك ياعم عبده ويستمر الحلم
كنت في طريقى
كنت في طريقى أول أمس متجها من المنصورة إلي مطار القاهرة وعلي طول هذا الطريق تتراكم أكوام هائلة من القش تنتظر الليل حتي يتم إشعال النار فيها! والسؤال هو هل الدولة في حاجة إلي بلاغات من المواطنين؟ يا سادة أكوام القش بطول عشرات الكيلو مترات أقوي من أي بلاغ...
تعرفي المشكلة دي بتفكرني بحكاية منع البناء في الأرض الزراعية! طبعا أنا ضد البناء علي الأراضي الزراعية لكن بالتسبة للمحافظات اللي ملهاش أي إمتداد صحراوي لو الحكومة مانظمتش الموضوع ووضعت خطط إمتداد عمراني إزاي ممكن تتخيل إن الناس حتسمع كلامها؟
القصة هيه هيه.... متحرقوش القش..متبنوش في الأرض الزراعية....ماتدفعوش رشاوي لإنهاء مصالحكم المشروعة أصلا!!!!
تعلـيق