بنت مصريةللنور طبيعة مزدوجة.. والعالم أيضاً

النهاردة، رحت كتب كتاب ولاء صحبتي..

كتب الكتاب كان في الجامع بعد صلاة العصر. الجو كان جميل جدا والشمس سعيدة.. حنينة ومشرقة ورامية نورها ع الشوراع والبيوت والسحاب.. ولون السما.. لون السما كان يجنن

بقول أنا كنت في كتب كتاب ولاء، وكان بقالي فترة ماشفتش ولاء، ولا رشا، ولا رشا، ولا آية، ولا شيماء، والولد يوسف ابن رشا بقى بيمشي..

مصلية السيدات بتطل من فوق على المسجد، فكان سهل نقف نتفرج على كتب الكتاب، ونسمع الخطبة - واللي طبعا بتحض على حاجات محدش بيعملها إلا من رحم ربي، زي عدم المغالاة في المهور وتيسير الزواج وكده - وبعدين الدعاء للعريسين.. قصدي الدعاء للأربع عرسان

أصل مكنش كتب كتاب ولاء بس، كان كتب كتاب أختها شيماء بردو

وعمو والد ولاء، قال مرتين.. في يوم واحد.. "زوجتك ابنتي.."، المفروض انه بيردد طبعا ورا المأذون، لما المأذون قالها.. افتكرت السنين اللي فاتت لما كان عمو بيطلع القطط الفطسانة في أي عريس يتقدم لولاء.. ناس كتير أوي أوي اتقدموا وهو كان بيرفض. الثانيتين اللي بين نطق المأذون وبين نطق عمو، قلبي وقع في رجلي أحسن مايقولش.. بس قالها.. قالها وهو واثق انه "بيزوج ابنته" لحد بيطمن له وهيطمن عليها معاه

مبروك يا لولو :)