بنت مصريةللنور طبيعة مزدوجة.. والعالم أيضاً

حاسة إني جعانة تدوين. عايزة اكتب حاجات كتير، مش فاكرة منهم ولا حاجة.. يمكن اكون بس محتاجة ارغي؟

هو انا ليه صحيح مش بتكلم كتير مع الناس؟ حتى مع اقرب اقرب الناس ليا؟ ليه بسمع حواديتهم وحكاياتهم ولما ييجي السؤال لحد عندي، اقول مفيش اخبار.. عادي يعني.. الحياة بيس.. والايام زي بعضها، ويمكن مع شوية ضغط اتكلم عن شغلي وخلاص... مع ان عندي كلام كتير، افكار كتير، احلام كتير، اراء كتير.. ليه مش بقول ولا بحكي؟ انا عندي مشكلة؟

من فترة وانا حاسة ان عندي مشكلة. مشكلة في الاتصال مع الناس.. ابتدت تتوغل وتستفحل.. الحماس اللي بيتولد فجأة بينطفي فجأة.. زياراتنا للأهل في العيد كانت تقيلة على قلبي، لولا من فكرني بصلة الرحم ماكنتش قاومت حالة الانغلاق دي. حتى نزولي اسكندرية في العيد كان محوط باحساس باهت كده ان مفيش حاجة دايمة، وان لحظات السعادة والانبساط واحنا بنفطر ع البحر وبنغني بمزاج اغاني بنحبها هتروح بسرعة.. هتحصل عشان تنتهى.. هتم عشان تتخزن في مكانها الدائم بالذاكرة.. كأني بعيش للذاكرة.. ولشحنها بالصور الكتير اللي بناخدها.. وتخلص الزيارة، وافضل انا زي ما انا.. اسمع اكتر.. اقول رأيي في اللي بسمعه، انما احكي؟؟ ليه مش بعرف احكي؟

دا حتى بقى عندي احساس دائم اني مش بعرف اعبر عن رأيي غير كتابة، احساس مؤكد مش قادرة اتخلص منه، الكلام بالتالي بقى يطلع بالعافية وباختصار.. ويمكن اتوه في وسط الكلام وانسى "انا كنت بقول ايه؟"

الناس بتضيع، والكلام بيضيع، وانا معنديش حتى رغبة في اني ابذل مجهود كفاية اني احافظ ع الناس واتدرب ع الكلام

يوووو. معلش الكلام حود شمال مني، معرفش ايه اللي خلاني بدل ما احكي عن رغبتي في التدوين احكي عن عزوفي عن الكلام، حتى انت يا تدوين!!

عموما، دي صورة اخدتها.. من يوم كان جميل وفات.. شكرا ايمان، شيماء، هدى :)