انتو يا عالم يا اللي فوق، ياللى قاعدين على سحابة سودا وتخينة ومدلدلين رجليكوا وبتاكلوا في اته محلولة، يا اللي بتقولوا ان "الناس ايام الملك فاروق كانت بتئن من العبودية والا مكنتش الناس التفت نحو الثورة" *
بعيدا عن ايام الملك فاروق والملك عبد ربه، وبعيدا عن ثورة 23 يوليو والكلام ده.. عمرك شفتنا عملنا ثورة عشان مصطلحات زي "الحرية" "الديمقراطية" "التعددية".. هل عمرنا عملنا ثورة ضد مصطلحات زي "العبودية" "الظلم" "الفساد" ؟؟؟
يا فندم، الشعب لو عمل ثورة هيعملها عشان لقمة العيش.. واللي تقضي.. اللقمة الي تسد جوعة يعني
ودي مشكلتكم اللي بتورثوها لبعض جيل ورا جيل، وفي الاخر تقولوا هو الشعب مش فاهمنا ليه، هو الشعب مش بيعمل ثورة ليه
ليه الشعب ما بيعملش ثورة عشان الديمقراطية ولمنع التزوير في الانتخابات ؟
ليه الشعب ما بيطالبش بإلغاء قانون الطوارىء اللي مفروض عليه من سته وعشرين سنة، واللي لما بيقع حد في طريقة محدش من أهله بيعرف له طريق إلى ما شاء الله
ليه الشعب مابيعملش ثورة ضد الفساد.. والمحسوبيات.. والواسطات.. والرشاوي.. والسرقات.. والقروض المنهوبة.. والأراضي المتباعة.. والشركات المتخصخصة؟؟؟
لأن كل دا كوم... والضربة المباشرة كوم تاني.. لقمة العيش طالما موجوده، كله بيهون
لقمة العيش، لو حتى بتيجي بصعوبة.. بس بتيجي، يبقى كل شىء يتعوض
لو في لقمة عيش.. الناس مش هتدق كتير / مش هتدق اصلا على مين يبقى الحاكم ولا مين يبقى النائب في الدايرة.. يبقى زرووها ما تزوروهاش مايهمناش
لو في لقمة عيش.. يبقى عادي يعني لما يستمر قانون الطوارىء واهو الموضوع محتاج مننا شوية حرص، وأدب - بتعريف معجم حبيب الصحاح الصادر عن دار نشر طره الطبعة اللازقة- وامشي عدل يحتار امن الدولة وقسم شرطة العمرانية فيك
يا مصري
لو في لقمة عيش.. يبقى مش مشكلة لو كبر على قفانا كام واحد.. وكبروا بفسادهم.. ما هم مسيرهم هيروحوا النار.. ومنهم لله
لو في لقمة عيش.. مش هيبقى عندنا مانع ندفع رشوة، ونسوق واسطة.. واهو الواحد مضطر.. والمضطر يدخل الجنة والمرتشي يحصل اخواته ع النار..
وحتى المرض، والكبد والسرطان.. والنسبة الخرافية المرتفعة في صفوف المصريين نتيجة زرعتهم الموصومة بالمبيدات وما خفي من بلاوي والي.. فامر المرض في النهاية قضاء وقدر.. ولا راد لقضاء الله
يا سيدي، اذا الشعب يوما حرم من كوب الماء.. ستسمع خشخشة جرادل يحملها اصحابها ويسدون الطريق السريع، اذا الشعب يوما وجد أن 300 جنيه شهريا لا تكفيه عيش حاف.. سيمارس الشعب الاضرابات بنفس السهولة التي يتبعها في تناول الشاي. اذا الشعب يوما وجد نفسه في الشارع بعد أن هدمت البلدية بيته.. ستقع في نفسك -وانت قاعد في بيتكوا بتتفرج ع العاشرة مساءا- ارهاصات ثورة. يمكنك أن تسأل جرادل المياه.. واوركسترا غزل المحلة وصفارة المايسترو.. والمقسمين بعزة جلال الله من عباده الموظفين بالضرائب العقاريه
لا اعدك رغم كل هذا بثورة. فالثورة غيب ، وما عندي من العلم إلا التمني. ولا أعدك اذا قامت ثورة أن يستجيب القدر، فالقدر يستجب اذا أراد الشعب الحياة، ونحن نريد فقط لقمة العيش.. ولم يذكر لنا أبو القاسم الشابي ماذا يحصل للشعب الذي يثور من أجل لقمة العيش.
ونصيحتي، من اختك الصغيرة اللى بتدور على مصلحتك، ان لا تنقم على "الشعب المفجوع اللي بيدور على لقمة العيش دون ان ينظر إلى مخاطر عدم تحقيق الديمقراطية وانهيار العدالة الاجتماعية في ظل نظام حاكم فاسد ومتطورىء".. أولا، لأن الشعب ماتعلمش في المدرسة وهو صغير اللى انت اتعلمته من كتب دادي في مكتبة بيتكوا الكبيرة. ثانيا، لأن الجوع كافر، والمعدة الفاضية صاحبها معذور.. تعذره السما قبل الارض، ويرحمه الرب قبل العبد.. الرسول صلى الله عليه وسلم كان بيدعو قائلا: "اللهم اني اعوذ بك من الكفر والفقر".. واقتران اللفظين "الكفر" و"الفقر" بيوضح علاقة ما بين الضعف الانساني وضغوط الفقر.
قصره، لو الحج اسماعيل جاركوا خرج في مظاهرة او اضراب او اعتصام على غير عادته.. فاعلم ان الثورة المباركة على الابواب، حتى لو كنا مانعرفش بعد الثورة هيحصل ايه.
بيتين إرتجال
بيتين إرتجال :)
و كيف لشعبٍ أن يفكر فى ديموقراطيةٍ و بطنه تئن من جوع
إنها سياستهم يا بنيتي ، بطن جائعة و شعب مطيع
ثورة الجياع لا
ثورة الجياع لا تبشر بخير. فهي هوجة تدمير وانفجار على غير هدي. لا أستبشر خيراً إلا بثورة عقلاء أحرار. ولذلك فالأمل الوحيد هو التربية والتعليم، هما السبيل الوحيد لثورة مباركة بحق. انظروا مثلا لثورة يوليو، لم تكن حتى ثورة جياع، ولكنها كانت ثورة جيش ورجال جيش، لا ثورة عقلاء وحكماء، وقد أفسدت كثيراً وما زلنا نعاني من شظاياها إلى ما شاء الله.
رأيي دائماً، من يريدون العمل لخير وإصلاح فعليهم بالثالوث الملوث: الفقر والجهل والمرض.
متفقة معاك يا
متفقة معاك يا محمد
لما بتكلم عن اضطرابات واعتصامات الناس دلوقتي.. عن فكرة "الثورة" لشعب ماتعودش يثور، فانا بحاول الاقي سبب حقيقي.. واللي انا حاساه انه احنا اتعلمنا نخاف على لقمة العيش.. اللي يخلينا ننفجر في حالة ضياعها. دا كله لا يلغي فكرة التعليم والتربية، ومايلغيش الخوف من ثورة الجياع.. وهمجيتها - لأنها في النهاية ثورة مش مبنية على اصول انسانية زي "الحرية" و "الديمقراطية" ،" و الحق" و "الخير" ، "الصح" و "الغلط".. انما مبنية على فكرة بدائية.. سد حاجات الانسان الاساسية المادية
ومع اهمية ان البداية تكون باالتعليم والتربية، فمهم كمان نقدر الظروف،نفهم الناس والخطوة اللي ممكن يقدموا عليها.. تقدير الظروف خطوة مهمة عشان يبقى عندنا امل في الحل. عشان قبل ما نضرب كلام عن الديمقراطية والتزوير والطوارىء,, نوضح العلاقة بينهم وبين الفقر والجوع والمرض. نكشف الروابط دي.. دا مهم اوي، كمان ادراك ان الناس لما هتتحرك هتتحرك بدافع الجوع هيفرق في فهمنا عن لما نتصور انهم اتحركوا عشان بيبحوا مصر وللا شايفين ان حالتهم الديمقراطية مش ولابد
مش عايزين نضحك على نفسنا.
زي اللي قلتو
زي اللي قلتو كتير
بس ده مش المفروض يبقي "عادي" يا زيزي
مش المفروض اننا نبقي ناس بتجري بس ورا لقمة العيش امال ايه اللي يفرقنا بقي عن الحيوانات
طبعا الحيوانات مابتكلش عيش بس اكل يعني D:
بس والله انا حاسس ان فيه امل جديد مع الاضرابات اللي كل مايخمدوها تولع تاني
يا مسهل
ماهو "مش
ماهو "مش المفروض انه يبى عادي" بس دا "الحقيقى"، "الواقعي" حتى الآن. تفتكر يا احمد ايه الافضل اننا الاضطرابات سببها الحقيقي ايه وللا نخدع نفسنا ونقول هييييه ثورة ع الابواب، الاضطرابات الي حاصلة واللي ممكن تحصل والل ممكن تزيد مش هتكون اضطرابات للاصلاح.. انما اضطرابات انفجار.. اضطرابات اخر الطريق، استبياع
من الأشياء التي
من الأشياء التي نجح النظام فيها منذ ما يقارب الثلاثين عام هو جعل المصري لا يفكر إلا في قوت يومه وأصبح الفارق يتسع كل يوم بين طبقات الشعب ... قله تملك الملايين من سرقه دم الشعب من الفساد والاحتكار والاغلبيه إما لا تجد قوت يومها وإما تكمل الشهر بالعافيه ... وللأسف الكل أصبح يعاني
==========
لا شـَـيْءَ عِـنـــْـدي هــَــا هـُـنــَــا...
كـَــيْ أخـْسـَــــــرَه ْ...
في وَطـــَــن ٍ عِـظـــَامــُـــهُ مُـكـَسـَّــــرَه ْ...
رَئِـيـســُــــهُ مـُرَفـــَّـــهٌ مـَـــــعْ قِـلــــَّــــةٍ مـُـتــْـخـَـمـَــــــةٍ
مـُسْـتـَـكـْبــِـــــرَه ْ...
و الـشـَّـعـْـــــبُ حــَـــــي ٌّ جـَـائــِـــــعٌ
في الــمـِــقـــْبـــَـــــرَه ْ...!
كـَـأنَّ جـُوعـَــــهُ غــَــدَا
مـَسْـألــــَـة ً...
مـِـــنْ رَبـِّـنــَـــا مـُـقـــَـدَّرَه ْ...
كـَـأنَّ جـُوعــَـــهُ عـَـلــــى طــُـــول ِ المـــَـــدَى ...
شــَـرْط ٌ لـنــَيــْــــل ِ المـغــْـفـِــــرَه ْ...!
* * *
لا شـَـيْءَ لـــي في جــُعــْبــَتــِــــــي
كـَـــــيْ أخـْســَـــــرَه ْ...
في وَطـــَــن ٍ غــَـــدَا لــَنــَـــا
حـَظِـيــــرَة ً مـُسـَــــوَّره ْ...!!!
نحَــْـــنُ الـقــَـطـِـيــــــع ُ قـــَــدْ فـَرَرْنـــَــا عـُمـْـرَنـــَــــا
مـِــــن ْ قــَســْـــوَرَه ْ...!
ذِهـْـني تــَخــَثـــَّــرَتْ بــِـــهِ حـَقــَائــِــــقٌ مـُـدَمــِّــره ْ ...
كـَـرَامـَـتــِــــــي ؟؟؟
خـَـلـــْـــــفَ الـرَّغِـيــــــفِ أُهــْــــدِرَتْ ...
و صِــحــَّـتـِــــــي ...
مـَـــعَ الــشـَّــقـــَــــاءِ مـُهــْــــدَرَه ْ...
و صـَاحــِـــــبُ الـسُّـمــُـــــوِّ في
عـَـلـــْيــَائــِـــــهِ ...
و الـصَّـوْلــَجــَــــانُ زَادَ ألـــْـــــفَ جـَـوْهــَــــرَه ْ...
شعر عبد الرحمن يوسف
=================
عموما دائماٌ أقول الشعب الذي يحدث له كل ما يحدث لنا ولا يئن ولا يثور على الظلم والفساد و... يستحق ما يحدث له
ولا يبقى إلا الأمل في رحمه الله وفي فجر قريب آتي
ولا ننسى أن أشد الليل ظلمه هو قبل الفجر مباشره
تقبلي خالص التحيه يا زينب
وبالحق الصوره فوق جميله جدا فكرتني بمدونتك بالقالب القديم
احنا شعب مستحيل
احنا شعب مستحيل يثور غير لو مات من الجوع حكومتنا الجميله المطهيه على راى مامى لا بتشبعنا ولا بتوصلنا للجوع الكافر اللى يوصل للثوره المنهج بتاع حزبنا الجميل المهطى برضو الديمو مجوعاتى المنهج بيقول اننا لو شبعنا هنفكر ونتدبر ونبحث عن الحريه لكن لو فضلنا جعانين هيكون كل همنا ازاى نلاقى لقمه العيش نلاقيها بسرعه نلاقيها بطلوع الروح مش مهم المهم اننا نلاقيها احنا ببساطه شعب لايمكن ومستحيل يثور غير لو مات من الجوع ومبروك على المدونه الجديده
نسيت اقلك ان
نسيت اقلك ان الناس طموحهم قل لدرجة ان لقمة العيش بمعناها الحرفي بقت تكفيهم يعني قارني اضرابات عمال المحلة واضرابات عمال السكك الحديدية في فرنسا وشوفي نسبة المطالب بالنسبة للمرتب الشهري في النحيتين واحسبيها كده وشفي احنا فين
:) تخيل انت باه
:)
تخيل انت باه شكل ثورة هدفها لقمة العيش "بشكل حرفي"
جملة
جملة اعتراضية..
أرى المسألة بمنظور مختلف تماماً..
أرى أن العلاقة بين المواطن والدولة وصلت لمنعطف شديد الخطورة.. انتهت مرحلة التعايش بين المواطن والدولة ، أو مرحلة تعايش المواطن في ظل الدولة ومؤسساتها أياً كان من يسيطر عليها إلى مرحلة أسوأ من لعبة القط والفأر.. ولا تسأليني مَن القط ومَن الفأر لأن الطرفين يتبادلان الأدوار من حين لآخر..
تضحك عليا أضحك عليك .. تقسى عليا أقسى عليك..
البعض في فئات مختلفة بمن فيهم نسبة كبيرة ممن يتظاهر ويضرب ويعتصم أصبحوا يلاعبون الحكومة على المشاريب .. بلا مبالغة .. لا يتعامل مع المال والمرتبات والامتيازات كضرورات حياة قدر ما هي في بعض الأحيان ثمن سكوت (تدفع كام وتطلق؟ مع الاعتذار للأفلام الهابطة) .. تدفعلي وتعمل لي اللي أنا عايزه حأمشي في مظاهرات المبايعة وأقول بالروح بالدم ليلي نهاري ..وأحط فوطة صفرة على جمجمتي وأقفل العداد.. متدفعليش ومتعينليش ولادي حأولع فيك!
تنحني الدولة للغني فيقول الفقير اشمعنى.. ويدور على حاجة يتحدى بيها الدولة زي ما بيتحدى الغني برضه الدولة..
بعد ما كانت الطبقات الدنيا بتخاف من أضعف أضعف سلطة في الجهاز التنفيذي والسلطة التنفيذية بقى مشهد معتاد مشهد الحرب بين سواقين الميكروباص والتباعين من ناحية وأمناء الشرطة وعساكر المرور من ناحية تانية!
حتى "حدانا" بعد كل اللي سمعه الفلاحين من الحكومة عن قش الرز واعتقاد الناس بإنه مش حيبقى فيه سحابة سودة رجعوا تاني ولعوا في القش .. تحدياً للدولة مش أكثر..
الحزبوطني عليه عامل كبير في اللي حصل.. لعب لعبة الكادر الخاص علشان يسكت المعلمين ، ولسة حيلعب ألعاب تانية كتير .. واحنا برضه علينا عامل لما بنتعامل مع الحزبوطني والدولة زي طفل أبويه منفصلين يروح لكل واحد يعيط ويصرخ لحد ما يديله بونبوني يسكت .. ولما يخلص البونبوني يرجع يصرخ تاني!
ألا هل قد بلغت؟
"نسبة كبيرة ممن
"نسبة كبيرة ممن يتظاهر ويضرب ويعتصم أصبحوا يلاعبون الحكومة على المشاريب"
انت اختصرتها يا شريف في الجملة دي.. انا مش شايفة تناقض بين كلامي وكلامك.. ما هو بردو السبب النهائي واحد، الفكرة الوحيدة عند الناس هي لقمة العيش، اخدوها بالحق كان بها، اخدوها بلوي الدراع واللعب ع المشاريب كان بها.. الفكرة مادية بحتة، ايا كانت الوسيلة، مافيهاش قيم او مبادىء قريناها في كتب وحاولنا نطبقها على مستوى شخصي بشكل ما.. وكل اللي انا عايزة ألفت النظر إليه هي الحقيقة المجردة دي، مش شايفة غيرها بصراحة، الناس مش بتثور عشان المبادىء، الناس بتثور عشان مرتباتها مش مكفياها، حتى جت سيرة الكلام ده مع فيلسوفنا الكبير عمرو عزت... وقاالي الاكتر من كده، ان "من الناس بيثوروا عشان لا المرتبات ولا الرشاوي مكفياها" -فيما معناه يعني-
اللي انا مش عارفة اجاوب عليه.. "طب وبعدين؟" اذا كانت دي حقيقة "الثورة للقمة العيش.. او زي ما شميتها "اللعب ع المشاريب" .. واذا كانت ثورة العيش دي مش هتكون ثورة "صحية لانها مش مبنية على مبادىء.. واذا كان الحل طويل المدي هو.. تطعيم الناس بالمبادى او يعني "التربية" هل نقدر نطبق الحل دا اصلا..
ديه مش هاتبقي
ديه مش هاتبقي ثورة ديه هاتبقي ماليطة
تعلـيق